Jump to content
URDU FUN CLUB
Sign in to follow this  
WET Eyes

Dead never lie

Recommended Posts

Frnds jald he meri ak story complete hone wali hai us k bad ye story likhun ga

jaisa k name se zahir hai ye story mare hui ak larki k pyar pe likhi jaye gi

  • Like 1

Share this post


Link to post
Share on other sites

"abey, ye kya tha?" Rohan achanak hi aaspas ki ghani jhadiyon se apni aur uchhal kar aaye gilahari numa jaanwar ko dekhkar uchhal kar teevrata se ek aur hat gaya.. Janwar ki uchhal mein jis prakar ki teevrata thi, uss'se yahi prateet hua ki usne unn par hamla karne ka prayas kiya tha...," tune iske daant dekhe?"

kareeb 10 - 10 feet ki lambi chhalang lagata hua wo uss ubad khabad Raste ke dusri taraf ki jhadiyon mein kho gaya..
Dono 2 pal wahin khade hokar uss ajeebogareeb Gilahari ko aankhon se aujhal hote dekhte rahe.. aur fir se apni anjan manjil ki aur badh chale..

"Uff.. kahan le aaya yaar...? kitna sannata hai yahan? yahan par toh aadmi ki jaat bhi najar nahi aati... kitna ajeeb sa lag raha hai yahan sab kuchh... Tujhe lagta hai yahan tujhe teri Neeru mil jayegi..? ... dekh mujhe toh lagta hai kisi ne tera ulloo banaya hai.. kyun bewajah apni raat barbaad kar raha hai... aur meri bhi.. chal wapas chal!" Nitin ne bolte huye sawdhani barat'ne ke iraade se rivolver nikal kar apne hath mein le li..

"Aisi baat nahi hai yaar.. wo yahin rahti hai.. aaspaas, Dekhna! koshish karenge toh wo hamein jaroor milegi.. wo agar nahi mili toh main pagal ho jaaunga yaar!" Rohan ne aage chalte chalte hi baat kahi...

Nitin aage aage bahut choukanna hokar chal raha tha.. choukanna hona lajimi bhi tha.. jahan iss samay wo the, uss jagah ke aaspaas koyi shahar ya gaanv nahi tha.. har taraf sannate ki bhayawah si chadar pasri huyi thi... Aawajein agar aa rahi thi toh meindhkon ke tarrane ki, aur rah rah kar jhadiyon ke jhurput mein kuchh rengte hone ki...door door tak kritrim roshni ka naamonishan tak nahi tha.. bus aadhe chand aur timtimate huye taaron ki hulki fulki roshni hi thi jo unko raasta dikha rahi thi.. raasta bhi aisa jo na hone ke hi barabar tha.. kahin uncha, kahin neecha.. beech beech mein gahre gahre gaddhe.. itne gahre ki dhyan se na chala jaye toh achanak poora aadmi hi unmein gayab ho jaye.. dono aur kareeb 4 - 4 feet oonchi jhadiyan thi...

"ab raasta saaf hota toh gadi hi le aate.. tujhe kya lagta hai..? yahan par koyi insaan rahta hoga.. aur wo bhi ladki.. sach batana, khud tujhe darr nahi lag raha, yahan ka mahoul dekh kar..." Nitin ne chalte chalte rohan se sawaal kiya...

"Darr lag raha hai tabhi toh tumhe lekar aaya hoon bhai.. nahi toh main akele hi na chala aata.." rohan ne jawab diya..aur achanak hi uchhal pada," Nitin dekh.. aage pakki sadak dikhayi de rahi hai.. main na kahta tha.. hum jaroor kamyaab honge... aage jaroor koyi basti milegi... dekh lena!"

"abey basti ke bachche.. uss'se koyi dhang ka raasta bhi toh poochh sakta tha tu.. aakhir wo log bhi toh shahar jate honge..?" Nitin ko bhi aage ka raasta pichhle raaste ke mukable behtar dekh kar kuchh ummeed bandhi....
"yaar, kya karoon, jab yahi ek raasta bataya usne...!" Rohan ne teji se chalna shuru kar chuke Nitin ke kadmon se kadam milate huye kaha....

"Ajeeb premika hai teri.. ek toh Raat mein milne ki jid kari aur upar se rasta aisa bataya.. chal dekh.. lagta hai hum pahunchne hi wale hain.. udhar light dikhayi de rahi hai.." Nitin ne apni baayi taraf hath utha kar ishara karte huye kaha...

dono bayi taraf mude hi the ki achanak thithak gaye..," yahan toh pani hai..yaar!" Rohan ne apne kadam wapas kheenchte huye kaha..
"humm.. koyi talab lagta hai..chal.. aage se raasta hoga... !" Nitin ne Rohan se kaha aur dono fir se seedhe raste par chal pade..

kuchh aage jakar unko ek pagdandi si bayi aur jati dikhayi di.. dono ne aankhon hi aankhon mein uss raste par sahmati jatayi aur uss aur badh chale...

"oh teri maa ki aankh.. yahan toh keechad hai..! chal wapas chal.. ye raasta nahi hai.." Man hi man Nitin uss ladki ko kos raha tha jiske pyar mein pagal Rohan apne saath saath uski bhi durgati kar raha tha...

"yaar, aadhe raaste toh aa hi chuke hain... aage chalkar talab mein dho lenge pair.. ab wo light bhi najdeek hi dikhayi de rahi hai..." Rohan ne mayusi se Nitin ko dekhte huye kaha..

"chal saale.. agar fir bhi ladki nahi mili toh dekh lena... aisi bakwas jagah maine aaj tak nahi dekhi" Badbadata hua Nitin fir se Rohan ke aage aage chalne laga...

 

"Dekhi kyun nahi hai? tu toh master hai aise thikano ka... aadhi jindagi toh tune jangalon mein gujar di.. mujh par ahsaan karne ke liye bol raha hai kya?" Rohan ne uss par majakiya vyangya kiya...

"haan.. gujari hai.. magar aise thode hi.. poore bandobast ke sath chalna padta hai.. tu toh mujhe aise le aaya jaise hum unke junwayi hain aur hamare intzaar mein wo kisi airport par palkein bichhaye baithe honge.. Ram jane kis ghadi koun janwar bahar nikal aaye? wo toh achchha hua mein kum se kum apni rivolver sath rakhta hoon.. koyi bharosa hai aisi beehad sunsan jagah ka.." Nitin ne sambhal sambhal kar pair rakhte huye bola... dono ki pant keechad ke chheenton se ghutno tak san gayi thi..

uske baad jyada der unko chalna nahi pada.. kuchh door aur chalne par wo ek saaf suthre raaste par pahunch gaye.. Raasta purane jamane ki chhoti chhoti eenton se bana hua tha.. wo jagah koyi chouraha lag rahi thi.... Pani ka 'wo' talaab yahan tak bhi faila hua tha.. " chal, apne pair saaf karke aage chalte hain.. ab wo ghar bhi jyada door nahi lagta..." Rohan ne gahri saans lete huye kaha..

dono ne wahan pani mein apne pair dhoye aur fir se aage badh gaye...

"yaar, yahan galiyan aur deewarein toh itni dikhayi de rahi hain.. par ghar kahan hain.. ? kya iss gaanv mein wo ek hi ghar hai jahan light jal rahi hai...?" Nitin ne hairani se Rohan ki aur dekha...

"maine poochha nahi yaar.. kya pata ek hi ho.. chal.. tu chalta rah!" Rohan ne khisiyayi huyi billi ki tarah se betuka sa tark diya aur apne pyar ko paane ki ummeed mein aage badhta raha.. Nitin ke sath sath..

bade hi vismaykari anubhav ka saamna dono ko karna pad raha tha.. kafi der tak chalne ke baad bhi wo 'roshni' unse abhi bhi utna hi door lag rahi thi.. unhone galiyan bhi badli, par har baar kuchh door chalte hi fir se wo roshni theek unke saamne aa jati.. aur fir se unko usi raaste par chalte rahne ka ahsaas hota...

"dhat tere ki... dekh.. rohan.. mujhe toh sab kuchh gadbad lag raha hai.. bhala aisi jagah par bhi aajkal koyi ghar banata hai.. 'wo' ladki sach mein yahan hogi na...?" Nitin thak haar kar khada ho gaya...

"hai na bhai.. tu mera.. are.. dekh bachcha!" Rohan ek dum uchhal pada..

Rohan ki baat sunte hi Nitin ka dil uski balliyon par aa gaya..," bachcha.. Raat ke 11 baje.. ghar se bahar, wo bhi aisi sunsan jagah par? aakhir tu mujhe baat clear kyun nahi kar raha.. koun hai wo ladki.. yahan aakhir karte kya honge uske ghar wale..!" Nitin ka dimag chakraane laga tha.. jis tarah si paristhitiyan wahan utpann ho rahi thi.. aisa hona lajimi hi tha...

Rohan ne bina kuchh bole Nitin ka hath pakda aur uss 'bachche' ki aur lapka..

Deewar ke sath khada wo bachcha jhuk kar kuchh kar raha tha.. jaise hi wo dono uske kareeb pahunche.. wo palat kar muskuraya...
bada hi masoom sa bachcha tha.. kareeb 8 saal ki hi umar hogi.. dono uski shakal dekhte hi hairan rah gaye.. uske munh par aisa lagta tha jaise kisi chot ka ghav bana hua ho.. taaja ghav.. uske honton ke paas se khoon ris raha tha.. uski aankhon mein gahri chamak thi.. aur chehre par ajeeb sa mailapan...

Dono uss'se kuchh doori par thithak gaye.. Bachcha unki aur lagataar, bina palakein jhapakaye dekh raha tha.. uski aankhon mein na toh aascharya ka bhav tha.. na hi kisi tarah ke bhay ka.. par aankhon ki tej chamak mein bhi ajeeb se soonepan ne unko chounka diya...
Nitin ne uss'se faasla banaye huye hi sawaal kiya," yahan kya kar rahe ho, beta.. itni raat ko...?"

"apne pairon ka keechad saaf kar raha hoon uncle.." badi hi masoomiyat se bachche ne jawab diya.. uski aawaj aur baat karne ke dhang se unko kahin se bhi ye ahsaas nahi hua ki uski umar 4 saal se upar hogi.. halanki kad kadi se pahle unhone uske 7-8 saal ka hone ka anuman lagaya tha...

"yahan koyi Neeru rahti hai.. ? bata sakte ho uska ghar kounsa hai?" Rohan ka dil baithne laga tha.. yahan toh sab kuchh ajeeb hi ho raha tha.. usne jaldi se wahan se talne mein hi bhalayi samajhi...

ladke ne ungali utha kar roshni ki aur ishara kar diya..," wahan! hum sab wahin rahte hain.. uss haweli mein!"

"matlab... matlab tum.. tumhari kuchh lagti hai kya wo?" Rohan ko rah rah kar jhatke se lag rahe the....

"par uss 'haweli' ka raasta kidhar se hai.. hum toh dhoondhte dhoondhte thak gaye.. aur tum ghar kyun nahi gaye abhi tak.. yahan kya kar rahe ho..?" Nitin ne bachche se sawaal kiya..

"main kho gaya hoon uncle.. mujhe bhi raasta nahi mil raha.. itne dino se dhoondh raha hoon.." ladke ne utni hi maasumiyat se jawab diya..

"kkkitne dino se..?" ladke ke har jawab ke sath dono ke dil ki gati badhti ja rahi thi..

" 74 saal se....?"

"bhag Nitin.. bhag.. hum fans gaye nahi toh.. samajh le maare gaye.." Rohan ne Nitin ka hath pakad kar apni aur kheencha.. bhagne ke liye.. par jaane kyun Nitin wahan se hil nahi paya...shayad utsuktawash," kyun majak kar rahe ho yaar? kyun jhooth bol rahe ho..?"
iss baar ladke ke chehre par shikan aur shadiyon purani tadap ubhar aayi," main majak kyun karoonga uncle? Marey huye log jhooth nahi bolte!"

Share this post


Link to post
Share on other sites

Rohan ki wahin khade khade ghighi bandh gayi.. Jis tarah ki ajeebogareeb paristhitiyan wahan utpann ho rahi thi, jis tarah se wo bachcha unhe mila aur jo kuchh usne bola.. dono ke kaleje bahar nikal aane par utaaru ho gaye.. Rohan ko ahsaas ho raha tha ki usne yun pagalpan mein yahan aakar kitni badi bhool ki hai.. wo khade pair wahan se bhagna chahta tha, par Nitin ko wahan chhodkar kaise bhage.. Wo bus Nitin ke ishara karne ka intzaar kar raha tha, jisne ghabrahat mein apni rivolver uss bachche par taan di," Get out from here?"

"kya uncle?" Nanhe se bachche ke chehre se nadani aur masoomiyat choo choo kar tapak rahi thi..

"Dafa ho jao yahan se! bhag jao..."

" par mujhe ek baar ghar chhod aao na.. mujhe ghar nahi mil raha hai..!" Bachche ne vinamrata se prarthna ki...

Sirf uss ladke ki wo pyari si aawaj hi thi jo ab tak unhe pairon par khade rahne layak sahas de rahi thi.. par aage badhne ki toh baat sochna bhi ab dushwar tha.. Nitin ne Rohan ki aankhon mein dekha aur wo ulte paanv ho liye.. kuchh door tak yunhi saawdhani poorvak pichhe dekhte dekhte jab wo uss bachche ki aankhon se aujhal ho gaye tab jakar Rohan ki aawaj nikli," Raasta yaad hai na bhai...?"

"Seedha chalta rah.. ab apni bakbak band rakh thodi der" Nitin ne gusse se usko jhidak diya..

uske baad toh unhone keechad wale raaste se hote huye sadak par jakar hi dum liya.. tab tak toh shayad saans bhi gin gin kar le rahe the... dono teji se ek dusre ka hath pakde huye aage badhne lage.. ab mendhkon ka tarrana unko kisi bhoot nagri mein chal rahe rahasyamayi sangeet se kum nahi lag raha tha.. jhadiyon mein jara si bhi sarsarahat hote hi dono ki saanse jam jati thi.. Ram ka naam japte japte aakhirkar wo apni gadi tak pahunch hi gaye... par jahan paidal jane mein unko ek ghante se bhi jyada ka samay laga tha.. wapas aane mein aadha ghanta bhi nahi laga...

"saale, kahan mout ke munh mein le gaya tha tu mujhe..?" Nitin ne gadi start karke be-intha pasine se sana apna chehra pouchha..

"sorry bhai.. mujhe nahi pata tha ki...." Rohan bhi ab dhang se saanse le pa raha tha..

"abe sorry ke bachche.. ye bata aakhir Neeru hai koun? kya lafda hai tera uss'se.. aur usne tujhe yahan kyun bulaya tha..." Nitin ne banawati gusse se kaha.. usko iss baat ka sukhad ahsaas tha ki wo sakushal wapas lout aaye.. 'wahan se'
Gadi ne jaise hi raftaar pakdi.. usko ahsaas ho gaya ki kuchh na kuchh gadbad jaroor hai," Gadi puncture ho gayi hai.. shayad.. ab kya karein?" kahkar Nitin ne gadi ki raftaar dheemi karte huye usko side mein rok diya...

Rohan sahmi huyi najron se Nitin ko dekhne laga," Sorry yaar.. meri wajah se..."
Nitin uski baat par dhyan diye bina Gadi se utra aur tyre check kiye.. charon tyre jameen mein dhanse huye se the.. sabki hawa gayab thi.. Nitin wapas gadi mein aaya aur apna sir pakad kar baith gaya...," ab kya karein.. ek mein puncture hota toh.."

"agla gaanv kitni door hai bhai.." Rohan khud ki nasamajhi se Nitin ko bhi pareshani mein daal dene ke karan sharminda tha..

"hoga koyi 5-7 kilometer aur.. kyun?" Nitin ab samanya ho chuka tha.. jo hona tha wah toh ho hi chuka tha.. Ganimat thi jo ho sakta tha, wah nahi hua..

"wahan tak le chalo kisi tarah.. shayad wahan koyi puncture lagane wala mil jaye.."
aur koyi chara bhi nahi tha.. Nitin ne gadi dheere dheere ludhkani shuru ki...

Gaanv aate hi unhone pahle hi ghar ke saamne Gadi rok di.. ye ghar gaanv se bahar tha.. kuchh alag hatkar," yahan poochhte hain.. gaanv mein koyi puncture lagane wala ho toh..."

Dono gadi se utare aur darwaje ke saamne jakar uss par thapki lagayi..

"koun?" ghar ke andar se aayi nihayat hi meethi aawaj ne unke kaano mein mishri si ghol di... aawaj kisi navyouvna ki lagti thi..

"ji.. hum bahar se aaye hain.. thodi madad chahiye..!" Nitin ne Rohan ke bolne se pahle hi jawab de diya...

"bapu! dekhna koun hai..?" Andar se ladki ki wahi sureeli aawaj bahar tak aa rahi thi..

'charrrrrrrrrrrr..' darwaja purana tha.. isi aawaj ke sath khula.. ek baar ko toh iss aawaj ne bhi unko dara diya tha.. kahte hain na 'doodh ka jala chhachh ko bhi foonk foonk kar peeta hai...

kareeb 60 saal ke adhed aadmi ne darwaja khola.. uski aawaj mein bhi utni hi madhurata thi.. upar se neeche tak dono ko dekha aur bola," Purane tiley se aaye ho na...?"

yahan toh rah rah kar jhatke lag rahe the.. Nitin ne Rohan ki aur dekha aur dheere se bola "jji.. kya matlab? purana teela? hum kuchh samjhe nahi..." dono ki halat dekhne layak thi.. Rohan man hi man soch raha tha.. ye raat kisi tarah se gujar jaye..

"tumhare pairon mein ye chipchipa sa keechad laga hai na.. isiliye poochha.. ye wahin ka keechad hai!" buddhe ne bina kisi shanka ke unse kaha..

dono ne jaise hi neeche jhuk kar dekha..," haan par..?"

"tumne khooni talab ke paas se gujre hoge beta... aa jao.. andar aa jao!" buddha kahkar pichhe ghoomne laga...

"jjii.. ji.. nahi.. dhanyawad.. wo.. hamein bus.. yahi poochhna tha ki.. yahan puncture koyi lagata ho toh.. hamari gadi.." Rohan ke liye pal pal kaatna mushkil ho raha tha...

"he he he he.. aa jao.. andar aa jao..!" Buddhe ne bade pyar se Rohan ki baanh pakdi aur houle se andar kheench liya... Rohan mein jaise pratirodh karne ki takat bachi hi na ho.. kathputli ki tarah wo andar uske sath ghus gaya...

ab Nitin ke paas bhi koyi chara nahi bacha.. Rohan ko yun chhodkar bhagta kaise? naho toh halat ab tak uski bhi patli ho chuki thi.... wo bhi pichhe pichhe ho liya...

 

 

."aao baitho! yahan aa jao..arre bhai sharma kyun rahe ho? aao baitho na!" Buddhe ne unko kamre mein le jate huye poori sharafat ke sath unn par haq jatate huye baat kahi.. par sharafat aur maasumiyat ke pichhe chhipi bhayawahta ko unhone ghanta bhar pahle hi mahsoos kiya tha.. isiliye dono ke man mein uthalputhal jari thi.. dono ne ek dusre ki aankhon mein dekha aur poori satarkta barat'te huye diwar ke sath bichhe palang par ja baithe.. unki kamar ke pichhe sirf ek sapat deewar thi.. wo wahan isiliye baithe taki kamre mein hone wali har gatiwidhi par najar rakh sakein...

" Shruti beta.. jara kuchh pani wani le aao.. itni der kyun laga rahi ho..?" Buddhe ne unn dono ke saamne baithte huye bahar munh karke aawaj lagayi...

"layi bapu..!" bahar se wahi sureeli aawaj dono ke kaano mein padi...

"toh.. wahan kya karne gaye the tum log? shahri maloom hote ho..!" Buddhe ne badi hi aatmiyata se dono se poochha..

"jji.. hum rasta bhatak gaye the..!" Nitin ne baat ko golmol karte huye jawab diya.. ye kahna unko katayi munasib nahi laga ki wo kisi ladki ki talash mein wahan apni aisi taisi karane gaye the...

"humm.. tum do hi gaye the ya koyi wahin rah gaya...?" Buddhe ne sahajta se baat kahi...

"ji.. kya matlab?.. hum do hi the bus..!" Iss baar bhi Nitin ne hi jawab diya.. Rohan toh chupchap hi unki baatein sun raha tha.. wo isi udhedbun mein tha ki yahan se niklenge kab...

"shukra hai.. dono theek thaak wapas aa gaye..!" buddhe ne gahri lumbi saans lete huye beedi sulga li," pitey ho kya?" kahkar buddhe ne beediyon ka bundle unki aur badhaya..

"ji nahi.. shukriya...!" Nitin ne vinamrata se mana kar diya..

Tabhi Rohan palang se lagbhag uchhal kar khada ho gaya," Nee...?"

Nitin ne chounkte huye pahle Rohan ki aur dekha aur fir uski najron ka anusaran karte huye nigahein darwaje par jama di..
"kya hua beta? tum khade kyun ho gaye...?" Buddhe ne bhi Rohan se baat kahkar darwaaje ki aur dekha," Ye meri beti hai.. Shruti.. Aa jao beti.. "

Rohan ki saansein uske halak mein hi atki huyi thi abhi tak.. Darwaje se andar aane wali ladki Neeru hi toh thi.. wahi Neeru jiske liye Rohan pagal hua ja raha tha.. Sundarta ki adbhut mishal thi wo.. Sir se lekar paanv tak.. chharhara lumba badan, hulki si lambayi liye huye lagbhag golakar gorey chehre par adbhut kashish liye huye lambi kajrari aankhein.. hulka gulabipan liye huye rasile hont, surahidar lumbi gardan.. aur..

khair yun kahein ki soundarya ras uske badan mein sirf dikh hi nahi raha tha.. mano tapak raha ho.. uski masoomiyat se, uske sharmile pan se, uske youvan se.. uski har ada se..

Bina ek baar bhi palakein uthaye usne unke saamne table par pani rakha aur wapas chalne lagi..

"Beti.. khana bana dena.. jane kab se bhookhe honge bechare..!"

"Ji bapu.. maine sabji rakh di hai.." Najrein jhukaye huye hi usne mudkar apne larajte honton se baat kahi aur bahar nikal gayi..
"ji nahi.. hamein bhookh nahi hai.. hum ab bus nikalenge.. aap bus kisi tyre puncture wale ka ghar bata dein" Nitin ne khada hote huye kaha.. darasal Rohan ko iss tarah chounkte dekh Nitin ke man mein anek sawaal khade ho gaye the.. aur wah jald se jald bahar nikal kar sab clear karna chahta tha...

"Nahi bhai.. aise kaise jane doonga tumhe? ye bhi koyi jane ka time hai.. aur iss gaanv mein koyi puncture lagane wala bhi nahi hai.. abhi aaram se khana khakar so jao.. subah dekh lena.." buddhe ne Nitin ka hath pakad kar usko wapas charpayi par baitha diya...

Nitin ne Rohan ki aur dekha.. uski aankhon ki chamak bata rahi thi ki usko apni manjil mil gayi hai..

" theek hai uncle ji.. jab aap itna dabav daal rahe hain toh yahi sahi.. aapka bada ahsaan hoga.." Rohan ko mano munh manga mil gaya...

"ismein ahsaan ki kya baat hai beta..! aadmi hi aadmi ke kaam aata hai.. aur fir mehmaan toh bhagwan hota hai apne desh mein.. kisi baat ki chinta mat karo.. ise apna hi ghar samjho!" Buddhe ne badi aatmiyata se muskurate huye kaha...

Buddhe ki baaton ne dono ko tasalli si di.. kum se kum yahan ab tak kuchh waisa nahi hua tha, jiss'se unhe yahan bhi kuchh ajeebogareeb hone ka darr rahe..

"Unlce ji.. ye khooni talab ka kya chakkar hai?" Nitin ne hichkichate huye baat chala hi di...

Nitin ke jikra karte hi buddhe ki aankhein ateet ka kuchh yaad sa karne ke andaj mein sikud si gayi," uske baare mein hum gaanv ke log kisi ko batate nahi beta.. bus itna khayal rakhna ki dobara kabhi uss taraf bhool kar bhi mat jana.. aur na hi kisi se iska jikar karna.. tum sahi salamat wapas aa gaye, iske liye bhagwan ka dhanyawad karo..!"

" hum kisi se nahi kahenge.. par batane mein harz kya hai? kuchh toh batayiye..!" Nitin aur Rohan dono utsukta se kuchh batane ka mood bana rahe buddhe ki aur dekh rahe the...

"hummm.. kisi se bhool kar bhi jikar mat karna.. hamare bade kahte the ki puraneTeeley ki 'aatmayein' bahar ke logon se nafrat karti hain.. ek baar koyi angrej tumhari hi tarah bhatak kar wahan chala gaya tha.. subah uski lash talab ke kinare par mili thi.. itne badey badey keedey chal rahe the uski aadhe khayi huyi lash mein.." Buddhe ne keedon ka size batane ke liye apni ungali ko lamba kar diya.. lash ka sir toh bilkul hi gayab tha.. uske pate ko cheer sa diya gaya tha.. aur dil chhati se bahar latak raha tha.. bus fir kya tha.. uski mout ka karan jaan'ne ke liye angrejon ne wahan dera daal liya... bahut koshish ki par kisi ko kuchh hasil na hua.. par uske baad mout bahut huyi.. par sari bahar ke logon ki.. isiliye ab hum kisi ko kuchh nahi batate.. padhe likhe log inn baaton mein visvash nahi karte na.. fir koyi wahan ka 'Raj' jaan'ne jayega aur khamkha mara jayega.. kya fayda..?" kahkar buddha apne chehre par peeda ke bhav liye chup ho gaya..

"hum aisi galati nahi karenge uncle ji.. kisi se kuchh kahenge bhi nahi.. batayiye na.. aur.. aisa kya hai wahan? aur wo khooni talab..?" Nitin ki utsukta badhti hi ja rahi thi...

"tum ab maanoge nahi poochhe bina.. darasal wo talab bahut purana hai.. hajaron saal purana.. uska pani kabhi nahi sookhta.. par jo wahan se tumhari tarah bachkar wapas aa jate hain.. wo batate hain ki raat ko talab ka pani laal ho jata hai.. khoon ke jaisa.. isiliye hum usko khooni talab kahte hain... 'aatma' ke prakop se bachne ke liye gaanv wale wahan khade peepal ke ped ki pooja karte hain.. dekhne wale batate hain ki raat bhar ped par roshni rahti hai.. par raat mein aaj tak koyi uske paas pahunch nahi paya.. ya jo pahuncha hoga.. mara gaya hoga.. suna hai wahan ek chhote bachche ki aatma bhi bhatakti rahti hai.."

"haan.." Rohan bachche ke bare mein bolne hi wala tha ki Nitin ne uska hath daba diya aur usne apni baat palat di," haan.. aatma hoti hain.. maine bhi suna hai!"

"suna kya hai beta.. gaanv walon ne toh uss bachche ko dekha bhi hai.. batate hain ki 'wo' bachcha wahan jane wale logon ko uske ghar chhod aane ko kahta hai.. peepal ke ped par....

 

 

" par wo aatmayein aakhir hain koun? aur bahar waale logon se hi nafrat kyun karti hain wo?" Buddhe ke har khulase ke sath Nitin ki utsukta badhti ja rahi thi.. sab kuchh jaan lene ke liye.. halanki wo 'aatma' ke chakkar ko nahi maanta tha.. par aaj raat ka anubhav usko unke baare mein aur sun'ne ko vivash kar raha tha...

"ab sachchayi toh bhagwan hi jaanta hai beta.. humare paas toh suni sunayi baate hain.. kahte hain ki uss peepal ke ped ki jagah pahle kisi raja ka mahal hua karta tha.. teen raniyan thi uski.. teeno ek se ek sundar.. fir kisi mughal smraat ne uss Raja ko hara kar raniyon ke saamne hi uss par chakla (Roller) chalwa kar marwa diya aur uss mahal ko apna 'haram' bana liya.. teeno raaniyon samet mehal ki sabhi auraton ko apna bandi banakar rakha... jo kuchh 'wo' unn raniyon aur auraton ke sath karta tha wo batane layak hai nahi.. tum mere beton ke jaise ho.. par haan.. har subah ek arthi uthti thi mahal se.. ye silsila tab tak jari raha jab tak ki mahal mein ek bhi aurat bachi... kahte hain ki ye 'aatmayein' usi raja aur unhi Raniyon ki hain..."

"ohhh..!" Nitin ne pratikriya vyakt karte huye kaha...

tabhi shruti khana le aayi aur usko table par sajane lagi.. Rohan lagatar uski aankhon ki aur dekh raha tha.. iss taak mein ki Shruti uski aur dekhe aur wo uski aankhon mein apne liye 'apnapan' dhoondh sake.. par badkismati se aisa hua nahi.. Shruti ne najrein upar hi nahi uthayi aur khana lagakar boli," aapke liye bhi le aaun bapu?" aawaj mein itni mithas thi ki Rohan uske munh se apna naam sun'ne ko taras gaya.. agar bapu na hota toh wo kab ka usko tok chuka hota...

"Nahi beti.. thodi der pahle hi toh khaya tha.. tum jao.. jakar so jao.. main aata hoon thodi der mein..."

"achchha bapu.. main kundi nahi lagaaungi.. aap aakar band kar lena.." Shruti ne apne pita ki aur dekhte huye kaha aur fir wapas mud gayi...

"aapke ghar mein aur koun koun hain uncle ji?" Rohan ka interest sirf Neeru ke baare mein jaan'ne ko hi tha..

"bus hum do jan hi hain beta.. biwi isko janam dete hi gujar gayi thi.. so aur koyi aulaad nahi hai.. kuchh din baad toh main akela hi rah jaaunga.." Buddhe ne jawab diya..

"wo kyun?" khana khate huye hi Rohan ne uski aur dekha...

" Shadi nahi karoonga kya beta.. ladki toh paraya dhan hoti hai.."

Roti ka tukda rohan ke halak mein hi atak gaya," kab.. kab kar rahe hain shadi..?"

"Abhi toh ye maan hi nahi rahi.. kahti hai padhayi poori karne ke baad sochoongi... nadan aur bholi hai par jiddi bhi bahut hai.. jo soch liya wo soch liya.. fir kisi ki nahi sunti ye.."

"ohh.. " Rohan ki jaan mein jaan aayi.. pahle usko laga tha ki kahin shadi pakki na ho gayi ho iski..

khana khane ke baad Buddhe ne bartan uthaye aur unko subah milne ko kahkar chala gaya..

uske jaate hi Rohan ne aankhein matkate huye Nitin ki aur dekha," kyun..? kaisi lagi..?"

"yahi hai wo?" Nitin ko shak toh tha.. par tajjub uss'se kahin jyada...

"humm.." Rohan khushi se foola nahi sama raha tha.. ajeeb si khumari mein usne takiye ko apni chhati ke neeche dabaya aur pate ke bal late gaya..

"par iska naam toh Shruti hai.. tu toh Neeru kah raha tha..?" Nitin ne dusre palang par lat'te huye dusra sawaal kiya...

"Naam mein kya rakha hai yaar.. bus.. itna jaan le, jiske liye main aaya tha.. mujhe mil gaya hai.. main tere iss ahsaan ka badla kabhi nahi chuka paaunga.. main na kahta tha.. Meri Neeru mujhe jaroor milegi.." Rohan par pyar ka bhoot sawaar tha..
"abey saale.. isne tere ko dekha tak nahi aur tu aise uchhal raha hai.. kahin tujhe bhool na gayi ho... kitne time pahle mili thi..?" Nitin uthkar baith gaya..

"wo sab main tere ko baad mein bataaunga.. par tu ye toh bata ki lagi kaisi tujhe..?"

"bahut pyari hai.. sach bolun toh.. iske jaisi koyi ladki maine aaj tak nahi dekhi.. agar ye Neeru na hoti toh main iske baare mein apne liye soch raha tha.. aur ab bhi kya pata.. ye Shruti hi ho.. teri Neeru ki hamshakal.. teri Neeru toh tujhe wahin milegi.. purane teeley par... he he he" Nitin ne shararati muskan apne chehre par laate huye kaha...

" aisi baat mat kar yaar.. mujhe achchha nahi lagta.." Rohan ne munh banakar kaha..

"majak kar raha hoon be.. par ek baat meri samajh mein nahi aayi...!" Nitin ne ko jaise kuchh achanak yaad aa gaya ho..

"wo kya?" Rohan bhi uthkar baith gaya..

"isne tere ko wahan kyun bulaya..? aur bulaya bhi toh wahan milna chahiye tha.. ab kisko pata tha ki humari gadi mein puncture ho jayega aur hum wapas aakar isi ghar ka darwaja khatkhatayenge.. agar hum seedhe nikal jate toh shayad hi kabhi dobara aate.. yahan par.." Nitin ki baat mein dum tha...

"haan yaar.. woh toh hai.. jab baat karegi toh jaroor poochhonga ye baat..." Rohan ne jawab diya...

" par ab toh bata de ye tujhe kahan mili? kaise mili.. aur kaise pati?" Nitin jaan'ne ke liye utsuk tha...

"ek baar baat ho jane de.. fir sab kuchh bataunga.. hamara milna uncle ji ki bhootn wali kahani se kum dilchasp nahi hai.. mujhe khud visvas nahi tha ki main iss'se mil paaunga..."

"abhi bata de na.. abhi kya dikkat hai..?" Nitin ne iss baar jor dekar kaha tha..
"na.. abhi nahi.. bahut dilchasp baat hai.. par abhi kuchh nahi kah sakta.. pahle iss'se baat kar loon...!" Rohan ne kaha aur wapas late gaya," chal ab so jate hain.. subah jaldi uthna hai.."

"theek hai beta.. log matlab nikal jaane ke baad kis kadar rang badalte hain.. ye main dekh raha hoon.. chal achchha hai.. main intjaar karoonga, teri iss'se baat hone ki.. gud night!"

"gud night bhai gud night!" Rohan ne kaha aur sir ke neeche se takiya nikal kar seene par rakh liya.. dono haathon mein daboch kar.....

Share this post


Link to post
Share on other sites

Raat kareeb 2 bajkar 17 minute...... Rohan Darwaje par pairon ki aahat sunkar chounk gaya.. uski ummeed ko poori tarah pankh lagey bhi na the ki kamre mein roshni chha gayi.. hulki si narajgi jatati huyi Neeru uski aankhon mein aankhein daale usko ghoor rahi thi.. houle houle chalti huyi wo uske pairon ke paas aakar uske palang par baith gayi..

"ye koun hai?" Neeru ne jhukte huye dheere se nitin ki aur ishara karte huye poochha..

"Mera dost hai.. mere bhai jaisa hai.. kyun?" Rohan ne bhi usi ke andaj mein jawab diya..

"isko kyun lekar aaye..? maine akele aane ko bola tha na..?" narajgi ab bhi Neeru ki naak par baithi thi..

"kamaal karti ho? aisi khatarnaak jagah par akele.. jaan lene ka iraada tha kya?" Rohan ne lete lete hi jawab diya...

"jaan toh main tumhari loongi hi.. ek baar samay aane do" kahkar Neeru katil ada se muskurane lagi.. uski isi ada ka toh Rohan deewana tha," chalo theek hai.. tumhari ye baat maan leti hoon.. isko lekar aa jao.. par isko door hi khada kar dena.. mujhe tumse jaroori baatein karni hain.. jane kab se tumhare liye tadap rahi hoon.. tumhe toh ahsaas bhi nahi hoga, meri mohabbat ka.."

"tumhari yahi baat meri samajh mein nahi aa rahi.. kahti ho mujhse pyar karti ho.. par aaj tak kabhi chhoone ki ijajat nahi di.. main bhi tumhare liye pagal ho chala hoon.. pls ek baar.. ek baar mujhe tumhe chhoo kar mahsoos kar lene do.. kitni pyari ho tum.. tumhare liye main yahan tak bhi aa gaya.. ek baar mere aagosh mein aa jao na.. pls!" Rohan uske shareer se utsarjit ho rahi youvan bayar ko apne andar tak mahsoos karne ko tadap utha...

"main bhi toh utni hi tadap rahi hoon dev! tumhe kya pata, mera ek ek pal kaise beet'ta hai.. uss pal ke liye jab main aur tum 'hum' honge.. ye faasle kitna tadpate hain, mujhse jyada koun samjhega.. bus intzaar karo... " Neeru ki aankhon se uske liye be-inthaa jajbaat jhalak rahe the...

"kitni baar bataaun ki main Rohan hoon.. agar tum kisi dev ke dhokhe mein mere pichhe padi ho toh maafi chahta hoon.. par fir bhi yahi kahoonga ki ab main tumhare bina rah nahi paaunga.. tumhare pyar mein jane.... tumne mujhe pagal sa kar diya hai.."

"duniya ke liye tum chahe kuchh bhi ho.. par mere liye toh mere dev hi ho.. mujhe tumhara yahi naam achchha lagta hai.. main toh yahi kahoongi.." Aankhon mein gahri pyaas aur madak ahsaas liye Neeru uski aur taktaki lagakar dekhti rahi...
"tum mujhe poori tarah pagal bana kar hi chhodogi.. mujh Rohan ko tum dev kahti ho aur apna naam Neeru bata rahi ho jabki tumhare pitaji tumhe shruti kahte hain.. main kya samjhoon aur kya nahi.." Rohan naam ke chakkar se abhi tak bhi nikal nahi paya tha..

"wahan aaoge toh sab samajh aa jayega.. ab yahan main tumhe kya bataaun?" Neeru ne bebas najron se usko dekhte huye kaha..

"Ajeeb ladki ho.. yahan mere saamne baithi ho.. uss waqt najar utha kar bhi tumne nahi dekha.. aur ab ye chhoti si baat batane ke liye mujhe wahan bula rahi ho.. itni khatarnaak aur darawani jagah maine aaj tak nahi dekhi.. pata hai.. ?" Rohan ke chehre par uss ajeebogareeb jagah ki darawani yadon ki tees chha gayi..

"kya? tum wahan gaye the? par maine tumhe 12 baje ke baad aane ko kaha tha na.. ruke kyun nahi wahan par..." Neeru adheer hote huye boli...

" kaise rukte..hum wahan gaye toh hamein wahan ek bachcha mila.. itna khoufnaak manjar tha ki meri toh jaan hi nikal gayi hoti.. aur tumhe pata bhi hai.. wahan bhoot rahte hain.. tumhare pitaji ne hi bataya tha.." Rohan ne spast kiya...

"asamay gujar chuke logon ko bhoot kahkar unka majak na banao dev.. tumhe ham... unki peedaaon ka ahsaas nahi hai.. har pal kis vedna aur dard ki bhatthi mein tapte rahna padta hai.. ye tumhe kya maloom.. tum toh aajad ho.. kahin bhi aa ja sakte ho.. par wo har tarah se ek dayre mein bandhe hain.. harpal usi dardnaak manjar ko aankhon mein liye tadapte rahte hain.. jis ghadi jindagi ne badi kroorta se unke sir se apna hath hata liya.. wo har pal isi intzaar mein rahte hain ki kab koyi rahnuma aayega aur unko wahan se, uss jahannum se mukti dilayega.. Aa jao na dev.. sirf ek baar aa jao.. main har pal tumhara intjaar karti hoon.. ek baar wahan aa jao meri jaan.. mujhe jahnnum se nikal kar jannat mein le chalo.." Neeru bolte bolte bhawuk hokar gidgidane si lagi..

"aise kyun kar rahi ho.. mujhse tumhari ye bechaini dekhi nahi jati.. par aisa kya hai jo yahan nahi bata sakti.. wahin jana kyun jaroori hai Neeru..?"

"wahan jana jaroori nahi hai dev.. par mujhe darr hai.. maine yahan bata diya toh tum wahan shayad kabhi nahi aaoge.." Mayoos Neeru ki aankhon se aansoo chhalak uthhe..

"iska matlab tumhe mere pyar par bharosa nahi hai.. iska matlab kuchh aisa jaroor hai jo tum mujhse chhipa rahi ho.. jab tum mujh par vishvas nahi karti toh main tum par kyun karoon..?" Rohan baat jaan'ne ko lalayit lag raha tha..

"tumhare andar ke Dev par mujhe poora visvas hai.. par bahar ke Rohan par nahi.. waqt jaane kitni karwatein badalta hai.. iss darmiyan jaane tum kitni baar badle hoge.. main isiliye darr rahi hoon.." Neeru apna hath badhakar uske chehre ko chhoone ko huyi par kuchh yaad aate hi turant wapas kheech liya...

"dekho Neeru ya shruti, tum jo bhi ho.. tumne apne pyar mein toh mujhe pagal kar hi diya hai.. ab asliyat mein pagal hona nahi chahta.. paheliyan mat bujhao.. par itna jaan lo ki jab tak tum mujhe sab kuchh sach sach nahi batati, main wahan wapas nahi jaaunga.. hargij nahi.." Rohan ne do took jawab diya..

"aisa kyun kah rahe ho dev.. kya main yunhi tadapti rahoongi..? tum meri baat samajhte kyun nahi ho.. aa jao na pls..." Neeru ki halat dayneey ho chali thi..
"main toh sab samajh raha hoon.. agar samajhta nahi toh yahan tak aata hi kyun.. achchha chalo.. main wada karta hoon ki agar tum abhi sab kuchh bata doge toh tum jahan kahogi, wahan aane ke liye taiyaar hoon.."

kuchh der sochte rahne ke baad Neeru boli," ye Rohan ka wada hai ya fir Dev ka.."
Rohan jhalla utha..," kya hai yaar.. dev.. rohan.. dono ka wada raha.. Dev ka bhi.. aur Rohan ka bhi.. ab toh bata do..."

"soch lo.. dev ke wade sooli par jakar bhi nahi toot'te.." Neeru ko kuchh ummeed si bandhi..

"humm.. soch liya... wada raha.. Dev ka!" Rohan ne kahte huye apna hath badhaya par Neeru ki taraf se koyi pratikriya na mili....

Neeru ne lambi saans chhodte huye chhat ki aur dekha.. aur achanak hi bolna shuru kar diya..," Wo bachcha.. jiski tum baat kar rahe ho.. mera chhota bhai hai..

"kyaaaa?" Rohan Neeru ki iss baat ko pacha nahi paya aur neend mein hi andar tak kaanp gaya.. hadbada kar lagbhag cheekhte huye wah uth baitha.. cheekh ke sath hi Nitin ek pal mein hi uth kar palang se khada ho gaya..," kya hua?"

"ye.. ye light kyun band kar di.. Neeru kahan gayi.." Rohan ka sir chakra raha tha.. band aankhon mein jahan usko ujala hi ujala dikh raha tha.. aankhein kholte hi.. andhere ke siva usko kuchh najar na aaya.. wahan toh pahle se hi andhera tha.. ujaala toh sapne mein Neeru sath lekar aayi thi...

"Neeru, Yahan? saale tu pagal ho gaya hai kya? sapna dekh raha tha ya?" Nitin ne Rohan ko kandhe se pakad kar hila diya...

Rohan ne jaise taise khud ko sambhala," haan bhai.. sapna hi tha.. sorry.. so ja.."

"Ab thodi bahut raat bachi hai.. usmein toh chain se so lene de tu.. kya ho gaya hai tujhe.. bata na.. tu khulkar kyun nahi batata..?" Nitin ne uske kandhe par hath rakh kar pyar se poochha...

"kuchh nahi yaar, so ja.. subah baat karenge..!" Kahte huye rohan munh dhak kar late gaya..

"dekh.. koyi baat man mein nahi rakhni chahiye.. ganth ban jati hai.. aur fir mujhse chhipa kar tujhe milega kya? baki teri marzi hai.. subah ka intjaar karoonga.." Nitin ne kaha aur dusri aur karwat lekar so gaya...

Rohan ki samajh mein kuchh nahi aa raha tha.. pichhle kareeb 2 mahine se uski raaton ki neend aur din ka chain haram tha.. karan Neeru hi thi.. har raat ko wo uske sapno mein aati aur din bhar wo uske sapno mein khoya rahta.. jindagi achanak kitni badal gayi thi uski.. hamesha mast kalandar ki tarah jeene wala rohan shuru shuru mein toh inn sapno ka anand leta aur raat ko uske paas aakar usko pukar rahi iss haseena ke baare mein din bhar soch kar aanandit hota rahta.. Nitin ki baat sach hi thi.. Neeru ke jitni pyari ladki usne bhi aaj tak nahi dekhi thi.. par jald hi ye anand bechaini mein aur fir wo bechaini ek anjaane se lagaav mein badal gayi.. aakhir yahi ladki roj uske sapno mein kyun aati hai.. kya rishta hai iss ladki ka uske sath.. ladki ka sirf sapne mein aana bhar hi hota toh baat alag thi.. par wo toh usko dono ke pyar ki duhayi deti thi.. apne paas bulati thi.. sapne mein uski aawaj yun lagti thi jaise kisi gahri khayi se bol rahi ho.. ruk ruk kar kahi gayi uski baatein pratidhwanit hokar baar baar uske kaanon mein goonjti rahti thi.. raat bhar.. din bhar...

apne mast andaj ka malik Rohan doston mein uske hansi majak aur ladkiyon ko bahv na dene ke karan hamesha chhaya rahta tha.. par achanak hi wo gumsum sa rahne laga.. poochhne ki koshish bahuton ne ki.. par batata bhi toh kya batata Rohan.. ant mein jab uski bechaini aur apne aapko Neeru kahne wali ladki ke prati uska lagaav charam ko paar kar gaya toh usne ek baar uske paas jaane ki than li.. par Neeru ki ek shart ne usko Nitin ka sahara lene par majboor kar diya.. ek toh sirf raat ko hi mil pane ki bebasi aur dusra uske paas aane ke liye bataye gaye raaste ki geography..

Nitin uske sabse najdeeki doston mein se ek tha.. wo agyaat jagah par jane, ghumne firne aur beehad aur door daraj ke ilaakon mein jakar wahan ke logon ki din charya jaan'ne ka shoukeen tha.. infact, adventure uski life ka ek hissa tha...

Rohan ne Nitin ko ek kahani banakar sunayi.. usko yakeen tha agar sapne wali baat usko batayega toh sath dena toh door.. ulta doston kein uski kirkiri karne mein bhi kasar nahi chhodega.. usne Nitin ko bataya ki bahut pahle ek ladki se wo mila tha aur ab usko pata chala hai ki wo ladki uss'se be-intha pyar karti hai.. aur usko milne ke liye bula rahi hai.. pahle pahal toh Nitin ne usko inn khamkha ke chakkaron se door rahne ki hidayat dekar saaf mana kar diya.. par jab usko kayi dino tak lagataar Rohan ka chehra utra hua dikhayi diya toh ek din usne khud hi Rohan ko tok diya," kahan hai wo ladki.. chal mila lata hoon.."

"yaar.. unka ghar gaanv se door hai.. kafi aage chalkar.. " Rohan iss baat ko kha gaya ki ladki ne usko bataya tha ki usko kafi door paidal chalna padega....

"achchha.. fat'ti hai teri.. isiliye mujhko bola.. hai na.. nahi toh tu mujhe batata bhi nahi ki tu Majnoo ban gaya hai aajkal..." Nitin ne majak kiya...

"kuchh bhi samajh le yaar.. par mujhe uss'se ek baar milkar aana hai...!"

"hummm.. chal fir kal hi chalte hain..!" Nitin taiyaar ho gaya uske sath jane ko...

aur wo kal 'aaj raat' hi thi...
---------------------------------------
par jo kuchh bhi aaj raat ko unhone dekha.. usne uski vyakulta kam karne ki bajay aur badha di.. khas tour se tab, jab usne sapno mein roj aane wali ladki ko saakshat apni najron ke saamne dekha.. Shruti ke roop mein.. uss waqt tak toh teeley se wapas aate huye wah yahi soch raha tha ki ye sab mehaj uske dimag ke feetoor ke alawa kuchh nahi tha.. par ab; ab toh wo katayi aisa nahi soch sakta tha.. uske sapno ki rani yatharth bankar uss'se rubaroo ho chuki thi.. bhale hi uska andaaj berukha raha ho.. bhale hi uska naam shruti raha ho.. kuchh na kuchh toh baat jaroor hai.. warna isi gaanv ki ladki uske sapne mein kyun aati...

par ab.. aaj raat ke sapne ko wo kaise le.. kahin 'Neeru' sach mein koyi bhoot toh nahi.. usne teeley par milne wale bachche ko 'apna bhai bataya.. chakkar kya hai.. aur fir bhoot toh daraate hain.. pyar thode hi karte hain.. fir bhoot bhi maane toh kaise maane.. ladki toh uske saamne thi hi.. Rohan ko lag raha tha jaise wo bhi uss ladki ke pyar mein buri tarah jakda ja chuka ho.. wo fir se usko apne sapne mein lana chahta tha.. apne anginat sawaalon ke jawab lene ke liye.. uss'se uska sambandh kya hai.. ye jaan'ne ke liye... isi udhedbun mein wo kab kho gaya aur kab khud ko neeru batane wali shruti fir uske sapne mein aa gayi usko pata hi nahi chala...

"kya ho gaya tha.. tum chale kyun gaye the, beech mein hi.." Neeru wahin baithi thi.. uske pairon ke paas..

"main kahan gaya tha.. chali toh tum gayi thi.. mere sapne se.." Rohan neend mein badbadaya...

"haan.. magar sapna toh tumhara hi tha na.. tumne wo tod diya.. mujhe jana pada..!"

"tum sapne mein hi kyun aati ho..? uthkar aa jao na.. barabar wale kamre mein hi toh ho..." Rohan ne jawab diya...

Neeru ne yahin par usko sab kuchh batane ka iraada kar liya tha.. uske Dev ne wada jo kiya tha.. iss janam mein uska sath dene ka... " samajhne ki koshish karo dev.. main wo nahi hoon.. jo tum samajh rahe ho.. wo toh shruti hi hai jise tum apne saamne baithi dekh rahe ho.... main Dev ki priyadarshini hoon.. aur iss janam ke tumhari Neeru.."

Rohan kisi tarah apne aap par kabu paye raha.. usko sab kuchh jaan lena tha.. aaj hi,"matlab hamara pichhle janam ka koyi sambandh hai?"

"pichhle janam ka nahi.. pichhle kayi janmo ka.. Priyadarishini ke har janam mein maine tumhara intjaar kiya.. par main tumhe isi janam mein dhoondh saki.." Neeru ne jawab diya..

"par tum mujhe pahle bhi toh dhoondh sakti thi.. matlab pichhle janmon mein.." Rohan ne tark diya...

"haan.. aur maine bahut dhoondha bhi.. par meri ek seema hai... hum ek daire se bahar nahi nikal sakte.. 2 mahine pahle tum iss gaanv ke paas se gujre.. aur maine tumhe pahchan liya.. tab se main iss baat ka intjaar kar rahi hoon ki tum kab aaoge mere paas.. matlab Neeru ke paas.. kab hamara milan hoga.. isi wajah se maine iss ghar mein rahne wali ladki ka roop churaya.. taki tumhe iske aakarshan mein bandh kar apne paas la sakoon... kyunki iss'se sundar koyi aur ladki mujhe aaspaas dikhayi nahi di.." Neeru lagataar bol rahi thi ki Rohan ne usko tok diya..

"par agar tum aatma ho toh hum kaise mil sakte hain.. batao.."

"nahi main aatma nahi hoon.. main bhi janam le chuki hoon.. kayi baar.. iss baar bhi.. Neeru ke roop mein.. sirf uska dil uss locket mein atak kar wahin mahal mein hi rah gaya tha jo Dev ne Priyadarshani ko diya tha.. yani tumne mujhe.. pyar ki pahli aur aakhiri nishani ke roop mein.."

"ye locket ka kya chakkar hai?" Rohan ne usko fir toka..

"wo ek lambi kahani hai.. hamare pyar ki.. hamare milne ki aur milan poora hone se pahle hi hamari judayi ki.. kabhi fursat mein bataaungi.." Neeru ab uska jawab sun'ne ko utaawali thi...

Rohan ko kuchh kuchh palle pad raha tha.. par bahut kuchh nahi," aur ab asli Neeru ko koun dhoondhega? kahan kahan bhatkoon main.. aur kyun bhatakoon?"

Share this post


Link to post
Share on other sites

tumhe bhatakne ki jarurat nahi hai.. har janam mein wo mere sampark mein rahi hai.. aakhir main bhi uska hissa hoon.. Amritsar se 50 km door Batala kasbe mein rahti hai wo.. Govt. college ke aaspaas ghar hai uska...mujhe iss baat par garv hai ki har janam mein wo anjaane mein hi sahi par kunwari hi rahi.. tumhare alawa maine kisi ke baare mein socha tak nahi Dev.. tumhare alawa mujhe koyi chhoo bhi nahi paya.." Neeru ka gala bhar aaya..

"oh.. aur main..?" Rohan ko uski ajeeb magar meethi si kahani mein maja aane laga tha...

"tumhara mujhe nahi pata.. aur iss janam ki toh tum khud hi jaan'te hoge..." Neeru ne usko pyar se dekhte huye kaha...

"toh kya wo mujhe dekhte hi pahchan legi..?" Rohan ke man mein sawaalon ki jhadi lagi huyi thi....

"bus yahi ek samasya hai.. uske liye tumhe usko wahin lana hoga.. mahal mein.." Neeru ke chehre par udasi chha gayi..

"ab ye mahal ka kya chakkar hai?" sawaalon mein se hi itne sawaal nikal rahe the ki purane sawaal Rohan bhoolta ja raha tha...

"jahan tum gaye the.. wahan ek peepal ka ped hai.. uske neeche hi hamara mahal hai.. tumhe Neeru ko wahin lekar aana hoga.."

"ek minute.. ek minute.. jo ladki mujhe jaanti nahi, pahchanti nahi.. usko main kaise la sakta hoon.. aur wo bhi aisi jagah par jahan ke bachche bhi itne khatarnaak hain.." Rohan ka sir chakra gaya..

"iska jawaab mere paas nahi hai.. par agar tum uske dil mein pyar jagaoge toh wo aa sakti hai.. tumhare sath.. tumhe uska pyar bhi jeetna hoga aur bharosa bhi... ye kaam tumhe apne tareeke se karna hoga...."

" Mujhe nahi pata ki ladkiyon ka dil kaise jeet'te hain.. iss maamle mein ekdum anadi hoon... tum hi kuchh batao!" Rohan ki samajh mein kuchh nahi aa raha tha..

"tum jab Dev the, tab bhi aise hi the.. sharmile aur jhenpoo.. par tumhe kuchh na kuchh toh karna hi hoga..." Neeru apne Dev ki yadon mein khokar muskurane lagi....
" sorry Neeru.. ye sab main nahi kar sakta.. kisi anjaan ladki se maine aaj tak baat bhi nahi ki hai.. aur tum usko yahan lane ko kah rahi ho.. ye nahi ho sakta.. aur fir usko bhi raat ko hi lana hoga.. hai na?"

"haan Dev.. ye meri majboori hai.."

"shit.. never possible.. aisa kabhi nahi ho sakta.. aur fir tum hi batao.. main tumhari baaton par kyun visvas karoon.. aur visvas kar bhi loon toh main itni badi tension mol kyun loon..? ye jaan'ne ke baad ki tum koyi bhatakti huyi aatma ho; mere dil mein tumhare liye sahanubhuti ke alawa kuchh nahi hai.. par fir bhi main maafi chahta hoon.. meri jindagi se nikal jao.. tumne meri hansti khelti jindagi barbaad kar di hai.. main pagal sa ho gaya hoon.. tumhari baat ko sach maan bhi loon toh mujhe ab kuchh yaad nahi hai.. fir main toh kisi bhi ladki se pyar kar sakta hoon.. shadi kar sakta hoon.. sach boloon toh main subah Shruti ke papa se apne rishte ke baare mein baat karna chahta hoon.. maine apni jindagi mein isi ladki ke sapne dekhe hain, jiska chola pahne abhi tum mere saamne baithi ho.. mujhe iss'se pyar ho gaya hai.. toh kyun na main Neeru ke aage pichhe bewajah chakkar lagane ki bajay shruti par hi dore daal loon..? pls.. mera pichha chhod do.. aaj ke baad meri jindagi mein mat aana.. main tang aa gaya hoon tumhari baatein sunkar... main aur kuchh jaan'na nahi chahta.." Rohan ne seedhe aur nirdayi shabdon mein apni baat kah di...

Neeru ka chehra safed pad gaya.. Rohan ko iss baar pakar bhi kho dene ke bhay aur gusse ke wo kaanpne si lagi," Dev.. tumhare wade ka kya hoga..?" Neeru ke munh se kahte hi siski si nikli...

"bhad mein gaya wada.. i dont care.. mujhe marna nahi hai abhi.. jeena hai.. apne liye.. ghar waalon ke liye..!"

Neeru khadi ho gayi," theek hai Dev.. main ja rahi hoon.. aainda kabhi nahi aaungi.. maine toh ye sochkar tumhe kabhi khud ko hath bhi nahi lagane diya ki mere dwara dharan ki gayi deh kisi aur ki hai.. usko hath lagwakar main tumhe dushit karke khud ko paap ka bhagi nahi banana chahti thi.. agar tumhe yahi pasand hai toh lo, noch daalo abhi isko, kar lo apni hawas poori..." kahte huye Neeru ne gusse se apna gale se pakad kar apna kameej kheench kar taar taar kar dala.. Shruti bani Neeru ardhnagn awastha mein najrein jhukayein siskiyan le rahi thi..

Rohan ki aankhein sharm se jhuk gayi.. Usko yun najrein jhukaye dekh Neeru ne khade khade hi bolna shuru kar diya," kash tumhe ahsaas karwa sakti ki tum kya the, kash tumhe Dev aur Priyadarshini ki mohabbat se rubaroo karwa pati.. tumhe Dev ke waade ki keemat ka ahsaas hota toh tum kabhi aisa na kahte, jaan par khel jate apni Neeru ko apne gale se lagakar usko kum se kum iss janam mein poorn nari banane ke liye.. beshak uske paas priyadarshini ka dil nahi.. fir bhi usne Dev ko kiya wada har janam mein nibhaya hai.. beshak wo tumhara intjaar nahi karti.. par kisi ka bhi intjaar nahi karti wo.. iss janam mein bhi aise hi jayegi.. aur mera kya hai? kash mujhe tumhare diye gaye locket se bhi utni hi mohabbat na hoti jitni ki tumse hai.. toh meri aatma mere dil ko bhi sath lekar nikal jati.. yun na tadapta rahna padta mujhe.. janam janam tumhare aane ke intzaar mein... " Neeru ne bharbharate gale se kaha aur chupchap siskiyan leti uske sapne se gayab ho gayi.....

 

Agli subah Buddhe ne aakar Rohan aur Nitin ko uthaya.. Rohan ke sir mein dard tha.. Raat ke sapne ki baatein uske dimag mein ab hathode ki tarah baj rahi thi..
"kya baat hai? theek toh hai na?" Nitin ne usko iss tarah sir pakad kar baithe dekha toh poochh liya..

"Nahi bhai.. sab theek hai.. bus aise hi sir mein dard ho raha hai.." Rohan ne Nitin ki aur dekhte huye kaha..

"toh ab chalein ya teri neeru se milne ki tamanna hai.." Buddhe ke wapas jate hi Nitin ne Rohan ko chheda...

"uska naam bhi mat le yaar mere saamne.." Rohan fat pada...

"arey main tujhe fone karke teeley par bulane wali ladki ki baat nahi kar raha.. main iski baat kar raha hoon; Shruti ki.. mili toh yahi thi na tumse.. kafi pahle.. tu kah raha tha..." Nitin ne usko khangaalna shuru kiya...

"abhi kuchh mat bol yaar.. pls.. mere sir mein dard hai.." Rohan ab bhi apna sir pakde baitha tha...

"chal chhod.. tu tension kyun leta hai.. abhi nikalte hi hain bus yahan se.." Rohan ne uss waqt baat ko taal diya..

"main fresh hokar aata hoon yaar.. Toilet kidhar hai.. kuchh idea hai..?" Rohan khada hote huye bola...

"bahar nikal kar dayi taraf seedha chala ja.."

"thanx.." kahkar jaise hi Rohan bahar nikalne ko hua, unke liye chay banakar la rahi Shruti uss'se takraate takraate bachi..,"oh sorry..!" Rohan thithak kar khada ho gaya..

Shruti uske saamne sir jhuka kar khadi ho gayi.. kya gajab ki mithas thi uske chehre par.. sundarta ka prayay kahein toh koyi atishyokti na hogi.. maare lajja ke usne abhi tak apni aankhein uthayi hi na thi uper.. ek baar bhi unse aankhein char nahi ki... kafi der tak jab Rohan usko thaga sa khada dekhta raha toh usko bolna hi pada," ji.. chay.."

"ohh.. andar rakh do.. main aata hoon abhi.. thanx!" kahkar Rohan usko raasta dekar aage nikal gaya..

Shruti chay lekar andar gayi aur table Nitin ki aur sarka kar chay uss par rakh di.. mudkar jaise hi wah bahar jane ke liye palti.. Nitin ne usko tok diya," kya naam hai tumhara?"

Shruti ke kadam wahin thithak gaye... sharmili thi par pagal nahi thi.. uske bapu ne kitni hi baar uska naam liya unke saamne.. wo samajh gayi.. line maarne ki firaak mein hai... wah do pal ruki aur fir se aage badhne lagi..

"Neeru.. ye bhi tumhara hi naam hai na..!" Nitin ne uske badhte kadmon par fir se viram laga diya..

"ji.. ji nahi.." Shruti ne jawab diya..

"Rohan tumhare liye hi yahan aaya hai.. koyi tumhara naam lekar usko yahan bula rahi thi.. tum mile ho na pahle.. wo ... tum dono pyar bhi toh karte ho.." Nitin ko jitna pata tha.. utna bol diya...

Shruti ko Nitin ki baatein samajh mein nahi aayi thi.. wah palat kar kuchh bolna chahti thi.. par uski himmat na huyi.. bina palte, bina ruke wah bahar nikal gayi...
"ajeeb ladki hai.." Nitin badbadaya... aur newspaper uthakar padhne laga... Shruti ne Nitin ki aakhir mein kahi gayi baaton ko sun liya...

Kuchh der baad Rohan wapas aaya toh Buddha wahin baitha tha... Rohan aate hi thandi ho chuki chay uthane laga toh buddhe ne usko rok diya," Rahne do beta.. thandi ho gayi hogi.. Shruti kah rahi thi wo aur banakar la rahi hai..

"oh uncle ji.. kya jarurat thi pareshan hone ki..." Rohan ne apni baat khatam bhi nahi ki thi Shruti wahan hajir ho gayi.. tray mein ek cup chay lekar..
Nitin ne aankhon hi aankhon mein Rohan ki aur ishara kiya.. mano kah raha ho.. "kya baat hai.. tum par toh badi meharbaan hai.."

Iss baar Shruti seedhi aakar Rohan ke saamne khadi ho gayi aur tray uski aur badha di... Rohan ne chehra uthakar uski najron mein jhanka.. iss baar aascharyajanak roop se wo uski hi aur dekh rahi thi.. aankhon mein aankhein daale.. Rohan uski aankhon mein dekhte hi sammohit sa ho gaya.. apni aankhon mein hi jahan bhar ki khushiyan samete wah uski aur taktaki lagaye khadi rahi.. jab kaafi der tak Rohan ne tray nahi pakdi toh Shruti ko bolna hi pada," chay lijiye...!"

"ohh haan.. thanx!" Rohan jhenp sa gaya.. Shruti ke bapu wahan nahi baithe hote toh Nitin koyi na koyi comment jaroor karta.. unke aankhe char karne ke andaj par..
"achchha uncle ji.. hum abhi nikalenge... bata sakte hain ki puncture lagane wala kahan mil sakta hai...?"

"kya jaldi hai beta.. khana wana khakar nikal jate.." Buddhe ne atithidharm ke naate baat kahi..

"nahi uncle ji.. pahle hi aap.. waise bhi hum late ho rahe hain.. puncture bhi lagwana hai.. jane kahan milega... hamein aagya dijiye ab.."

"theek hai beta.. jaisi tumhari marzi.. puncture ki ek dukaan agle gaanv mein hai.." buddhe ne bataya hi tha ki bahar se shruti ki aawaj aayi," Bapu.. ek baar aana!"
" ek minute.." buddha kahkar bahar nikal gaya... Rohan ke cup rakhte hi wo dono bhi yunhi bahar nikal kar gadi ke paas aa gaye..

"Nitinnn.. ye kaise hua? tune dhang se dekha tha na raat ko..." Rohan uchhal pada..

"kya hua?"

"hawa toh dekh tyres ki..." Rohan jaisechilla sa raha tha...

"oh my God.. kamaal hai.. haan maine mobile ki light jala kar dekha tha.. tab toh kisi tyre mein hawa nahi thi.. had ho gayi yaar.. yahan bhi?"

"kya hua beta..?" Rohan ki cheekh si sunkar Buddha lagbhag bhagta hua bahar aaya..

"uncle ji.. ye.. hawa.. Raat ko toh bilkul gayab thi.. ab kahan se aa gayi...? Rohan ne tyres ki aur ishara karte huye kaha...

Buddhe ke chehre par shikan tak nahi aayi," hum aise chamatkaaron ke aadi ho chuke hain beta.. aaj raat hi... Shruti subah uthi toh uska kameej gale se fata hua tha.. neeche tak.. bura mat maan'na.. par agar kamre ki kundi band na hoti toh main tum logon ke baare mein bhi jaane kya kya sochta... par yahan kuchh bhi ho sakta hai.. "

Nitin ne Aascharya se ek baar fir Rohan ki aur dekha.. wo raat ko sapne mein aayi Neeru ke baare mein soch raha tha.. sunn sa khada khada...

"chal theek hai uncle ji.. ab hum nikalein..." Nitin sab kuchh bhool kar jane ki taiyaari karne laga...

"shahar ki aur hi jaaoge na beta.." Buddhe ne vinamrata se sawaal kiya...
"haan.. shahar se hokar hi gujrenge... kyun?" Nitin ne jawab dete huye sawal kiya..
"nahi.. kuchh khas baat toh nahi thi.. Par wo.. Shruti ko bhi shahar hi jana hai.. college mein.. agar tum jyada late na ho rahe hote toh wo bhi sath hi chali jati.. bus ke intjaar mein bahut time kharaab ho jata hai.. wo kah rahi thi..." buddhe ne kaha..

Nitin man hi man uchhal pada... khushi se.. par khushi ko man mein dabakar rakhte huye bola," ye bhi koyi kahne ki baat hai.. waise hamein koyi jaldi bhi nahi hai.. ab toh puncture bhi nahi lagwana.. jitni der kahein hum rukne ko taiyaar hain.. "
"achchha beta!.. waise toh uska college abhi 2-3 ghante baad hai.. par main usko kah deta hoon.. wah jaldi se taiyaar ho jayegi..." buddha khush hote huye bola..
"nahi uncle ji.. koyi jaldi nahi hai.. hum tab tak ek kaam kar aate hain.. ghante bhar mein aa jayenge.. tab tak wo bhi taiyaar ho lengi..." Nitin ka man saatwein aasmaan par tha...

"theek hai beta.. jaisi tumhari ichchha.. main shruti ko bol deta hoon...." Buddha bada hi khush lag raha tha....

"hum bus ghante bhar mein aate hain uncle ji..." Nitin kahte huye Gadi mein baith gaya.. Rohan bhi uske sath ja baitha.. par uski samajh mein nahi aa raha tha ki ye Nitin aakhir ja kahan raha hai... Nitin ne Buddhe ke andar jate hi gadi start karke ghuma di," kyun be.. ab toh khush ho ja.. tere man ki ho gayi.. ji bhar kar baat kar lena.. mujhse toh baat ki nahi dhang se.." kahkar Nitin ne batteesi nikal di..
"par abhi tum wapas kahan ja rahe ho?" Rohan ne poochha...

"Purane teeley par.. dekhein toh sahi aakhir kya drama hai wahan.." Nitin ne gadi ki speed tej kar di..

"tu.. pagal ho gaya hai kya..? mujhe nahi jana wahan..." Rohan lagbhag uchhalte huye bola...

"tujhe lagta hai.. koyi dum hai buddhe ki baaton mein.. mujhe toh bahut bada natak lag raha hai.. aur mujhe lagta hai ki buddha bhi iss natak mein shamil hai.. dekha.. usko gadi mein apne aap hawa bhari jane par bhi aascharya nahi hua.. ulta kahani banane laga.. beti ka kameej fat gaya raat ko.. hunh.. aur ab dekh.. kaise apni beti ko hum jawan mustandon ke saath bhej raha hai.. bhala itna bhi nadan hai kya koyi aaj ki duniya mein... mujhe lagta hai ki shruti hi Neeru bankar tujhe fone karti hogi.. kuchh na kuchh chakkar toh jaroor hai pyare.. kahin ye teri karodon ki sampatti hathiyane ki toh nahi soch rahe.. tera ulloo banakar..." Nitin bolta hi jata agar Rohan usko beech mein hi na tokta..

" chup ho ja yaar.. aisa kuchh nahi hai.. ye sab mehaj ittifaq hai.. tu gadi wapas mod le..." Rohan jhallaya...

"Gadi toh ab Khooni talab par hi jakar rukegi beta.. mujhe wo peepal ka ped dekh kar aana hai.. aur uss bachche ko bhi dhoondhna hai.. tujhe utarna hai toh utar ja.. Rokoon kya?"

Rohan kuchh nahi bola.. kuchh sochta hua gadi ke bahar dekhne laga....

 

 

"late nahi ho jayenge kya? ab paidal chalna padega..." Rohan ne aage raste par gahra gaddha sa dekhte huye kaha..

"yahan se gadi ko raaste se neeche utaar kar try karta hoon.. uske baad jyada dikkat nahi aayegi... shayad nikal jaye... chalo yahan se toh paar huye... chal tu bata ab.. kya chakkar hai tera Shruti ke sath.. ab toh mujhe lag raha hai ki aaj tu kunwara nahi rahega..tujhe kya lagta hai?" wo gadi samet dheere dheere chalte huye badhte ja rahe the..

"kuchh nahi lagta bhai.. meri samajh mein to kuchh nahi aa raha.. ab main tujhe kaise bataaun?" Rohan ne uski aur dekhte huye kaha...

"kyun? mujhe nahi batayega toh kisko batayega.. saale, dost hoon main tera... bhai hoon..." Nitin ne uspar batane ke liye jor daala..," agar aaj tune sab kuchh nahi bataya toh samajh le.. fir tera mera maamla yahin khatam hai..."

"toh ye talab hai wo.. ismein toh achchha khasa saaf suthra pani hai... raat ko laal kaise ho jata hoga.." Nitin talab ko dekhte hi Rohan se kuchh bhi poochhna bhool gadi rok kar wahin utar gaya.. Rohan bhi sath hi neeche aa gaya..," chal na yaar.. wapas chalte hain.."

"abey kyun fat rahi hai.. tau ki baat maan bhi lein toh din mein toh yahan kuchh nahi hota.. chal aaja.." kahkar Nitin ek raasta dekh dayi aur badh chala..

"wo baat nahi hai yaar.. par mera man nahi hai.. aage chalne ka.. mood off hai.." Rohan uske pichhe pichhe chalta raha...

"kamal hai yaar.. ab toh keechad nahi hai.. lagta hai hum dusre raaste se aaye hain aaj.."

Rohan kuchh nahi bola.. uske dimag mein Neeru ki baatein koundh rahi thi.. agar sapne mein kuchh sachchayi hai toh wo usko dekh rahi hogi jaroor.. kum se kum usko pata toh chal hi gaya hoga ki main aaya hoon.. soch kar hi Rohan choukanna ho gaya...

chalte huye wo talab ke paar jakar usi jagah khade ho gaye jahan kal raat wo uss bachche se mile the... soonapan wahan ab bhi watawaran mein moujood tha par wo soonapan ab bhayawah nahi tha.. iske ulat ajeeb si shanti wahan pasri huyi thi.. insaano se rahit, hulki hulki bah rahi hawa mahoul ko aur bhi chittakarshak bana rahi thi... aisa lagta tha ki yahan pahle koyi gaanv basta hoga.. par ab wahan kuchh nahi tha.. sivay purani inton ki galiyon, tooti footi aadhi giri huyi deewaaron aur ekaadh aawara jaanwaron ke...

"kahan mil sakta hai wo bachcha.. saale ne raat ko khoob ulloo banaya.. sach mein darr gaya tha main.." Nitin ek jagah jakar khada ho gaya...

"main bhi.." Rohan ke munh se nikla...

"mujhe lagta hai wo kisi ghoomantu jati ka raha hoga.. ye log aisi hi jagahon par jakar rahte hain..." Nitin bachche ke bare mein idea lagane laga...

"tujhe wo aadiwasi lagta hai.. kitna pyara tha dikhne mein.. kya pata wo bhi koyi aatma hi ho " Rohan dheere dheere usko line par lana chahta tha.. taki jab wo uski kahani sune toh hanse nahi...

"ab tu bhi shuru ho gaya tau ki tarah... aur mujhe genetics mat sikha.. aadiwasi kya khoobsoorat nahi ho sakte.. kya pata kisi desi aadmi ka taanka fit baith gaya ho kisi aadiwasi aurat ke sath.. hota hai yaar... par ab kahan gaye wo..?" Nitin charon aur ghoom ghoom kar kuchh talash kar raha tha...

"koun?" Rohan ne poochha..

"aadiwasi yaar.. aur koun milega yahan.. arre dekh.. wahi peepal ka ped.. jiske baare mein tau baat kar raha tha.. aa.." Nitin uski aur badh chala...

"rahne bhi de ab.. chal wapas chal.. late ho rahe hain..." Rohan wahin khada khada bola.. man hi man Neeru ki yaad aur uski batayi gayi wo jagah Rohan ko ajeeb sa ahsaas de rahi thi.. uska man nahi kar raha tha.. ek pal bhi wahan khada rahne ko..

"abey aa na.. 2 minute mein kuchh nahi hota.. " Nitin ne wapas aakar Rohan ka hath pakad kar apne sath kheench liya..," waise bhi deri kis baat ki.. usko aaj college thode hi jana hai.. tere sath chounch bhidayegi aaj toh.. pyar bhari batiyan karegi.. sach mein bahut pyari hai.. agar inki taraf se koyi sajis na huyi toh tu beshak iss'se shadi kar lena.. aur nahi toh holi par toh.." kahkar Nitin khilkhila kar hans pada...

"mujhe nahi jana yaar aage.. tujhe jana hai toh ja.." Rohan apna hath chhuda kar wahin khada ho gaya... Neeru ki baatein uske dimag mein ab hathode ki tarah bajne lagi thi.. uska sir bhari sa hone laga...," main yahin ruk jata hoon.."

"saale darpok.. mujhe nahi pata tha teri bhi... chal tu yahin ruk.. main abhi aaya dekhoon toh sahi kaisa ped hai aur kitne watt ka bulb tanga hai uss par.. jo sari raat uss par roshni rahti hai..." kahte huye Nitin usko wahin chhodkar aage badh gaya...

Rohan ab akela rah gaya tha.. par jaane kyun usko hawa ki saany saany mein se chhan chhan kar aa rahi kuchh ajeeb si hulchal sunayi de rahi thi.. wo sach mein hi maan'ne laga tha ki Kuchh na kuchh toh jaroor gadbad hai uski life mein...neeru ki raat ko kahi gayi baatein rah rah kar uske dimag mein goonj rahi thi.. beshak Rohan ko wahan darr nahi lag raha tha.. par dimag mein lagataar ajeebogareeb tareeke se raat ki yaadon ka bhanwar uske dilo dimag ko shithil sa kar raha tha...

achanak rohan ko ahsaas hua ki usko pichhe se kisi ne chhoo liya hai.. ghabrakar usne pichhe palat kar dekha.. par wahan kuchh nahi tha.. kuchh bhi nahi..," shit.. ye mujhe kya ho gaya hai...?" man hi man Rohan badbadaya.. aur wapas mud kar Nitin ko dekhne laga.. Nitin ped ke paas hi khada tha...

Tabhi chhoti si deewar par rakha patthar wahan se ludhak kar neeche gir gaya.. ittifak se Rohan udhar hi dekh raha tha.. apne aap hi Rohan ki dhadkane badh gayi.. dheere dheere aage badhte huye usne deewar ke dusri taraf jhanka.. par wahan kuchh nahi tha...

sab kuchh ajeeb tha.. par Rohan ko ab wo sab ajeeb nahi bulki ek ishara lag raha tha.. Neeru ki taraf se, uske wahan par hone ka...

"tum yahin ho kya?" Rohan ne dheere se kaha... par usko koyi jawaab nahi mila...
"Neeru... Neeru.. agar yahan ho toh jawab do..." Rohan ne fir pukar kar dekha.. par koyi hota toh jawaab milta na...

Tabhi usko Nitin apni aur aata dikhayi diya.. Rohan chup ho gaya aur uski hi aur dekhne laga...

"mujhe visvas nahi tha tum yahan aaoge.." Nitin aakar uske paas khada ho gaya..
"haan.. main aana nahi chahta tha.. par tu hi le aaya jabardasti.. chal ab.." Rohan ne ghoomte huye jawab diya aur chalne laga...

"yani tum mere liye yahan nahi aaye..!" Nitin wahin khada ho gaya..

"ab chal yaar.. tere liye hi toh aaya hoon.. warna tu munh fula leta.. aur mujhe agli baar kaam padta toh nakhre dikhata.. chal ab.." Rohan wapas aakar uske paas khada ho gaya...

"par.. kya tumne socha nahi ki mera kya hoga..." Nitin apni jagah se hila nahi.. wahin khada khada bolta raha...

"kya anaap shanaap bak raha hai.. ab chal bhi..." Rohan jhalla utha.. usko wahan se nikalne ki jaldi thi...

"par tum samajhne ki koshish kyun nahi karte.. Dev.." Nitin ke munh se 'Dev' nikalte hi Rohan uchhal pada..

"whhhat.. kya bola tu..?"

"mera kya hoga Dev.. tumhare wade ka kya hoga.. bolo"

"ohh my God.. Neeru.." Rohan ke aascharya ka thikana na tha..

"haan Dev.. main ab bhi tumhara intjaar kar rahi hoon.. pls.. Neeru ko le aao yahan.. mujhe mukti de do.. fir jo man mein aaye karna.. main kab se tumhare intjaar mein tadap rahi thi.. kum se kum...... mujhe .....yahan .....se .....nikaal toh do...." kahte hi Nitin dhadaam se peeth ke bal gir pada," Dev.. mujhe wapas le chalo.. peepal ke paas.."

"Nitin.. kya ho gaya tumhe..?" Rohan ne ghutno ke bal baith kar uska sir apne hathon mein utha liya.. sab kuchh palat'ta dikhayi diya usko.. dharti ghoomti si dikhayi dene lagi..

"mujhe.. wapas le chalo dev.. dhoop mein mujhe... infection hota hai.. uska jahar tumhare dost ki ragon.... mein failna shuru... ho gaya hai... mujhe jaldi se.. wahin le chalo.. main wapas.... chali jaaungi..." Nitin atak atak kar bol raha tha.. uski saans foolti ja rahi thi..

Rohan ki samajh mein aur kuchh na aaya.. usne badi mushkil se Nitin ko uthakar kandhe par daala aur peepal ki taraf doud pada...

"haan.. yahin lita do.. ped ke sath.."

Rohan ne waisa hi kiya...

"mujhe mukti dilana Dev.. isko le jao yahan se.." kahte huye Nitin ki aankhein band ho gayi aur Rohan ne waisa hi kiya jaisi usko instruction mili thi.. wah pahle ki tarah Nitin ko kandhe par utha kar teji se chalne laga...

"abey.. mujhe yun kyun utha rakha hai ulloo ki dum..utaar neeche..." Nitin ke bolte hi Rohan ki jaan mein jaan aayi aur usne Nitin ko kandhe se utaar kar khada kar diya...

Nitin ki saanse tezi se chal rahi thi.. mano bahut lambi race lagakar aaya ho..," kya tha ye.. kahan utha le ja raha tha mujhe.. ?"

"tujhe maaloom bhi hai tu kahan hai..?" Rohan ne uska hath pakad kar kheench liya aur aage badhne laga...

"bata toh kya hua..?" Nitin ab samanya hone laga tha..

"chal bahar chal kar batata hoon..." Rohan ne kaha aur kuchh samay ke baad hi wo gadi ke paas the..

"tujhmein bhoot aa gaye the...." Rohan ne uski aur dekhte huye kaha...

"ha ha ha ha ha... tujhe pata nahi.. main ab bhi bhoot hi hoon...bhayankar bhoot..." Nitin ne gurrakar kaha aur fir bola..," chup bey saale.. mujhe ye majak ek dum ghatiya lagte hain.. chal gadi mein baith.." kahkar Nitin driving seat par aa gaya..
"tujhe visvas nahi hota na.. tujhe pata bhi hai main tujhe kahan se laya hoon.." Rohan uske sath wali seat par baithta hua bola...

"haan.. pata hai.. main ped ke sath leta hua tha jab tumne mujhe uthaya..." Nitin ne gadi start karke jawab diya..

"kyun... kyun leta tha tu wahan.." Rohan ne fir sawaal kiya..

Nitin ek pal ke liye chup ho gaya.. fir Rohan ke chehre par najrein thaam kar bola," pata nahi.. kamaal hai yaar.. visvaas nahi hota.. kya pata neend aa gayi ho.. chhanv dekhkar......."

 

 

 

 

 

 

 

 

83

Share this post


Link to post
Share on other sites

" humm.. ho sakta hai..." Rohan ne baat ko badhana nahi chaha.. usko Nitin ke nature ka pata tha.. agar wo abhi Nitin ko wo batein bata deta jo abhi thodi der pahle huyi toh Nitin ko wapas wahin ja kar chhanbeen shuru kar deni thi..," ab toh seedhe chal rahe hain na.. Shruti ke ghar?"

"aaye haye.. kya baat hai meri jaan..? tu toh bada utawala ho raha hai.. chinta na kar.. aaj sara din wo tere sath hi rahegi.. bus hulka sa ishara kar dena usko..." Nitin shararati sur mein bolte huye muskurane laga...

"tujhe wo kaisi lagti hai...?" Rohan ne Nitin se poochha...

"kya matlab?"

"bus aise hi.. bata na.. kaisi lagti hai...?" Rohan ne fir jor diya...

"sweet hai, sundar hai, sharmili hai.. kul milakar meri bhabhi ban'ne ke layak hai.. par agar tiley par bula kar darane ki sazish mein uska ya uske baap ka kuchh hath mila toh main unko chhodunga nahi.. pahle bata raha hoon.. mujhe dhokhebaazi se sakht nafrat hai..." Nitin ne saamne aa gaye gaddhe ko dekh kar gadi neeche utaar di...

"main kya poochh raha hoon.. aur tu kya jawab de raha hai..?" Rohan ne kaha..
"abey de toh diya jawab.. jhakaas hai ekdum... le lena aaj... bahon mein.. ha ha ha.." Nitin ne maskhara kiya...

"aur agar... mujhe kisi aur se pyar ho toh.....?" Rohan ne uske chehre ki aur dekhte huye kaha...

"saaale.. apne sath meri bhi durgati kyun karwa raha hai.. kitni 'basanti' hain tere paas.. kal iske liye fat rahi thi aur aaj.. ab mujhe mat batana wo nayi ladki koun hai.. samjha..!" Nitin ne jhalla kar banawati gusse se uski aur dekha...

"mmain toh majak kar raha hoon yaar...!" Rohan ne hichkichate huye baat kahi aur bahar dekhne laga.. gaanv kareeb aa gaya tha..

"majak kar raha hoon.." Nitin ne ajeeb sa munh banakar uski nakal utaari.. aur ghar ke saamne gadi rok kar horn diya... buddha lagbhag bhagta hua bahar aaya..

"wo.. taiyaar ho gayi kya uncle ji..?" Nitin ne gadi ka sheesha neeche karte huye poochha...

"haan.. beta.. wo toh taiyaar hai.. tum khana kha lo ek baar.. Shruti ne bana rakha hai.. tum dono ke liye..."

Nitin kuchh bolne hi wala tha ki Nitin ne pahle hi bol diya," theek hai uncle ji.. ek baar aur sahi..." kahkar dono gadi se utar kar andar aa gaye...

Andar jate huye, khana khate huye aur fir bahar aate huye.. Nitin apni bareek najar se ghar ke kone kone ka muayana kar raha tha.. shayad unke sath pichhli raat huyi ghatna se sambandhit kisi bhi suraag ki talash mein.. par kuchh hota toh milta.. aakhirkaar charon ghar se bahar nikal aaye.. Shruti ke liye rohan ne pichhli khidki khol di aur wo chupchap gadi mein ja baithi," achchha bapu.. main char baje tak aaoongi..!"

"theek hai beti.." aur fir Nitin se mukhatib hote huye bola," achchha beta.. aaram se jana.. aur isko bus-stand utaar dena.. wahan se chali jayegi.. apne aap.."

"kyun chinta karte ho uncle ji.. hum college hi chhod jayenge.. achchha.. namastey.."

"bhagwan tumhara bhala kare beta..." buddhe ke aisa kahte hi Nitin ne gadi ko raftaar de di.....

 

 

"kya matlab?" Rohan uski baat samajh nahi paya....

"tu ab meri baaton ka matlab poochhna chhod aur apne iss wahyat natak ka manchan shuru kar.. pahle tu mujhe jid karke wahan le gaya jahan aadmi toh kya aadmi ki jaat bhi nahi rahti.. fir wapas aate huye tujhe wo ladki mil bhi gayi.. ab iss ladki ne inkaar kar diya toh tu kah raha hai ki wo ye nahi koyi aur hai.. matlab kya hai teri baaton ka.. yeda samjha hai kya?" Nitin uski aur gurrata hua sa bola..

"nahi bhai.. main tujhse jhooth kyun boloonga.. hamesha maine tujhe bade bhai ki tarah mana hai.. par sach mein, meri khud samajh mein nahi aa raha ki ye sab aakhir ho kya raha hai.. mere sir mein hamesha chakkar sa rahta hai.. ye baatein sochkar.. tu hi bata main karoon toh kya karoon.." Rohan ne seat se sir tika apni aankhein band kar li...

"humm.. par ab ye tu kis aadhar par kah raha hai ki 'wo' ladki koyi aur hai.. fir se fone aaya tha kya...?" Nitin ne uss'se poochha...
"ummm.. haan..!" Rohan ne yunhi kah diya...

"laat maar na yaar baat ko.. ye ladki kitni mast hai.. kahe toh isko patwa doon.. chalegi na...?" Nitin ne sari baat chhod kar Shruti ki baat utha di...

"kaise?" Rohan aankhein band kiye huye hi bola...

"wo tu mujh par chhod de.. sirf ye bata, uske baad toh tu theek ho jayega na.. matlab tere dimag ka fitoor..." Nitin ne gadi rok kar uske kandhe par hath rakh diya...

Rohan kuchh der chup baitha raha, fir bola," nahi yaar.. mujhe uss'se milna hai ek baar.. uske baad tu jo kahega main kar loonga..."
"uss ladki ko dekha hai tune?" Nitin ne sawaal kiya...

"nahi.." Rohan ne fir apni aankhein band kar li...

"yahi baat... isi baat par itna gussa aata hai ki.. kyun apni achchhi khasi jindagi ko gadhe par laadna chahta hai.. tune usko dekha tak nahi hai.. fir kyun uske peechhe pagal hua ja raha hai.. main shart lagakar kah sakta hoon ki wo ladki shartiya iss'se sunder nahi ho sakti.. dekha hai kabhi najar bhar kar isko.. kitni thandak milti hai kaleje ko.." Nitin ne kahte huye dil par hath rakh liya..

"tujhe thandak milti hai toh tu hi le aa na bhai..!" Rohan uski baaton se tang aa gaya.. uska dimag toh ab wahin ghoom raha tha.. Batala!

"aur tu kya samajhta hai.. aaj bhi main isiliye chup raha ki ye teri hai.. warna main toh ticket kaat kar rahoonga.. kum se kum ek baar..." Nitin ne visvas ke sath kaha..

"hunh.. bada chup raha tu aaj.. baaton hi baaton mein balatkaar kar daala bechari ka.. aur kah raha hai.. main chup tha.. apne sath meri bhi dheeli karwa di...tujhe lagta hai ki ye ladki ab teri taraf dekhna bhi pasand karegi...?" Rohan ne vyangya kiya..

"tune mujhe kya apni tarah lalloo samajh rakha hai.. ek ek din mein do do ladkiyan patayi hain maine.. aur fir ye toh bechari bahut nadan hai.. iska toh ghante bhar ka bhi kaam nahi.. ladkiyon ki psychology, geography, chemistry.. sab jaanta hoon main.." Nitin ne seena fulate huye kaha...

Rohan Nitin ki iss baat par hanse bina nahi rah saka.. Nitin ne galat nahi kaha tha.. Rohan ke nature ke ulat wo ekdum T-20 style ka khiladi tha.. jis ladki par man aa gaya, usko bister par laye bina nahi chhoda.. aur fir agle match ki taiyaari.. yahin par Nitin aur Rohan mein jameen aasmaan ka farq tha..

"chal tu jo marzi kar lena.. par mera toh kuchh hal kar..."

" ab wo ladki kahan milegi..?" Nitin turant serious ho gaya...

"batala!" Rohan ne turant jawab diya...

"batata? ye kounsi jagah hai? aur wo tujhe kaise janti hai...?" Nitin ne shayad naam dhang se nahi suna tha...

"batata nahi Batala.. aur hum kabhi mile nahi hain.." Rohan ne baat spast kar di...

"ye le.. toh kya sapna aaya tha?" Nitin ne majak mein kaha..

"sach bataaun ki jhooth..?" Rohan ne aankhein kholkar uski aur dekha...

"ab bhi jhooth bolega toh kaan ke neeche doonga.. samjha kya hai mujhko..? chal shuru ho ja..." Nitin ne usko pyar se jhidki di...

"haan.. sapna aaya tha...!" Rohan ne bina ruke kah diya...

"what..?" Nitin ko uski baat majak lagi thi..

"sapna hi aaya tha bhai.. tumhari kasam...!" Rohan ko aakhirkaar kisi na kisi se toh apni vidambana share karni hi thi.. so apne sabse achchhe dost se kar li..

"lagta hai tujhe nasha ho gaya hai.. chal aa.. beer peete hain.. baad mein baat karenge.." kahkar hanste huye nitin ne gadi start karke wapas shahar ki aur ghuma di...

 

 

 

wahan se rawana hone ke baad jab Rohan aur Shruti mein se koyi kuchh nahi bola toh majbooran Nitin ko hi apna munh kholna pada," ja Rohan.. Pichhe baith ja.."

"mmain.. kkyun?" Rohan hakla sa gaya...

Nitin ne back view mirror ko set karke Shruti ke chehre par najar dali.. lagta tha uss par uski baat ka koyi asar nahi hua.. ya shayad uska dhyan unnpar tha hi nahi.. apni lambi kaali julfon ko baar baar kano ke pichhe le jane ki koshish si karti huyi wah bahar nihar rahi thi... uska chehra ekdum shant tha.. thahre huye jal ki tarah, na toh muskaan hi uske chehre par thi aur na hi koyi shikan..

"abey tu nahi toh kya main jaaunga.. setting teri hai ya meri..?" Iss baar Nitin ne jaan boojhkar tej bola tha, Shruti ne uski baat sunkar turant pratikriya di.. par bol kar nahi.. achanak usne najrein ghumakar Nitin ko dekha aur apni gardan jhuka li..

" bhai tu Gadi chalata rah na.. kahin nahi jana mujhe..!" Rohan ne khisiyakar jawab diya.. uska mann hi nahi tha shruti se baat karne ka... hota bhi toh anjaan ladki se kya baat karta.. ab toh sab saaf ho hi chuka tha... kum se kum Rohan ke dimag mein...

"Ajeeb kism ka prani nikla tu.. 2 din se mujhe gadhe ki tarah haank raha hai aur ab kahta hai ki... dekh le.. agar tujhe koyi problem nahi hai toh main shuru ho jaaun?" Nitin apni baat ka matlab aankhon hi aankhon mein Rohan ko samjhata hua bola...

unko iss tarah ki baatein karte dekh Shruti ke kaan khade ho gaye the.. uska chehra kuchh feeka sa pad gaya tha.. jab uss'se raha na gaya toh wo unki hi aur dekhkar dhyan se baatein sun'ne lagi....

"tu chalta rah na bhai.. bata toh raha hoon.. aisa kuchh nahi hai.. wo meri galatfahmi thi.. tu jo samajh raha hai, yahan wo maamla nahi hai..." Rohan ne usko chup karne ka prayas kiya...

"theek hai fir.. tera maamla nahi hai toh main fir kar leta hoon maamla.. ab beech mein mat bolna.." shahar ko najdeek aate dekh Nitin ne achanak nahar ke sath sath baney kachche raaste par gadi mod di...

Shruti sihar gayi aur kumpkapati huyi aawaj mein boli," ye.. ye kahan lekar.... ja rahe hain aap.. gadi rokiye....!"

"Chinta mat karo Neeru ji.. ye rasta seedha shortcut wahin jata hai.. jahan aap jana chahti thi.. ha ha ha" kahkar Nitin ne siti bajani shuru kar di..

Shruti badhawasi mein gadi ki khidki peetne lagi..," Mujhe utaar do.. main chali jaaungi.. apne aap!"

Rohan ko Nitin ke vyavhaar par tajjub ho raha tha.. itni bachkani harkar Nitin bhi kar sakta hai.. Rohan ko katayi ummeed nahi thi," kya kar raha hai yaar.. ye wo ladki nahi hai.. samjha kar.. iska koyi kusoor nahi..."

Nitin ne Rohan ko dekhte huye apni dayi aankh mari.. majbooran Rohan ko chup ho jana pada.. jane kya karna chahta tha Nitin...
"yyye.. aap log kahan lekar ja rahe hain.. Gadi rokiye pls.." Shruti gidgidane lagi..

Nitin ne uski baat par koyi dhyan nahi diya.. Gadi usi gati se aage doudti rahi..

"hamne suna hai kisi ne tumhara kameej faad diya raat ko.. koun aashik tha bhala.."

Shruti ko uski baaton se jyada apni jaan ki fikar ho rahi thi..," Mujhe nahi pata.. aap Gadi rok dijiye pls.."

"batayiye toh sahi.. fir main aapko wapas chhod aaunga.. wada raha.. waise kisi ka bhi kusoor nahi hai.. aap hain hi itni garam ki aapke sath jabardasti karne ka mouka mile toh koyi fansi ki bhi parwah nahi karega.. kyun Rohan?"

"Rohan ne munh pichka liya.. usko shruti ki badi daya aa rahi thi..

"rok dijiye pls.. Gadi wapas le chaliye.. main.. aapke hath jodti hoon.." sach mein hi hath jod kar Shruti rone lagi thi...

"Dekhiye miss.. mujh par aansoo asar nahi karte.. ladkiyon ka toh shikari hoon main.. 5-4 rape cases bhi hain mujh par.. isiliye salamati isi mein hai ki aap wo bolna shuru kar dein jo main poochh raha hoon.. warna.. mujhe apne jajbaaton par kabu karne ki aadat nahi hai.. aur aapke maamle mein toh main riyayat dene ke mood mein katayi nahi hoon.. " Nitin ne filmi lahje mein baat kahi...

Shruti ka gala sookh gaya tha uski baatein sunkar.. dheere dheere apni siskiyon par kaabu pati huyi si boli," kya...?"

"kya ye sach hai ki raat ko kisi ne aapki kameej fadkar upar se nangi kar diya tha...?" Nitin ne poochhtachh shuru ki..

Shruti ka sir sharam ke maare jhuk gaya.. par usne apni gardan haan mein hila hi di...

Nitin ne halanki uska hilta hua sir dekh liya tha.. par fir bhi wo bola," bolo!"

"haan.." Badi mushkil se Shruti ke gale se aawaj nikli...

"kisne?" Nitin ka agla sawaal tha...

"pata nahi.." Shruti ne sir jhukaye huye hi jawab diya...

"matlab koyi aapko nangi kar gaya aur aapko pata bhi na chala.. aapko lagta hai mujhe visvas ho jayega.."

"wo hamare gaanv mein aksar kuchh bhi ajeeb ho jata hai.. isiliye hamein aadat ho gayi hai.." Shruti ne sanyam se jawab dene mein hi bhalayi samjhi...

"aadat? yun.. nangi hone ki.."

Shruti ne iss baat ka koyi jawab nahi diya...

"fir toh main bhi try kar sakta hoon.. nahi?" Nitin ne bebaki se kaha...

Shruti subakne lagi.. uske paas bolne ke liye kuchh nahi bacha tha..

"chaliye chhodiye.. ye bata do ki mere sher se aap kab mili thi.." Nitin ne apna lahja apekshakrit naram karte huye poochha...

"ji..?" Shruti kuchh samjhi nahi..

"iss'se.. Rohan se aapki mulaqat kab huyi thi..?" Nitin ne Rohan ki kamar par hath maarte huye poochha...

"meri..? maine toh inko ab se pahle kabhi dekha bhi nahi...." sahaj sawalon ka jawab dete huye Shruti ka subakna kum ho gaya tha.. par anjane darr se wo ab bhi kaanp rahi thi...

"achchha? tumhe pata nahi ye aapka kitna bada deewana hai.. tumhare paas jane ke liye ye mujhe raat ko wo.. purane teele par le gaya.. itna pagal ho chuka hai ye.. aur aap kahti hain iss'se aap kabhi mili hi nahi... ye kaise ho sakta hai?" Nitin ne chalte chalte hi kaha...

Shruti ne hairani se Rohan ke chehre ki aur gour se dekha.. par 100-100 kos tak bhi uske pahle dekhe hone ka ahsaas apne dil mein jaga nahi payi," mera visvas kijiye.. maine inko pahle kabhi dekha nahi hai... main toh iss shahar ke alawa kabhi kahin gayi hi nahi..."

"main kah toh raha hoon yaar ki ye wo ladki nahi hai.. mujhe galat fahmi ho gayi thi... wo koyi aur hai...!" Rohan se ab chup baitha nahi gaya...

"tu chup ho ja bus.. aaj ke baad teri shakal bhi nahi dekhni mujhe.. ab kounse teele par le jane ki soch raha hai mujhe.. tera toh dimag kharab ho hi gaya hai.. mujhe bhi pagal karke chhodega tu.... Lijiye miss.. Shruti.. Aapka college aa gaya.. yahi hoga na...?"

Sunte hi Shruti ki bhay ke maare sikudi huyi aankhon mein chamak si aa gayi.. apna chehra uthakar usne chounk kar bahar ki taraf dekha..." haan.. aap.. ohh.. par aapko kaise pata mere college ka..." Khidki kholne ki koshish karti huyi wo boli.. par khidki khuli nahi..
"iss shahar mein yahi ek college hai.. mere khayal se... khair.. maaf karna.. main kuchh jaan'na chahta tha.. isiliye mujhe aapko darane ke liye ghatiya baatein kahni padi... pichhli khidki ka lock kholna Rohan..

Shruti kuchh na boli.. uska man ab uchhal raha tha.. bachne ki kam hi ummeed thi usko.. Gadi kholte hi wah teji se bahar nikli aur bina bole road paar karne lagi...

"ye sab kya bakwas thi Nitin... ? chal ab..." Rohan ki aankhein college ke gate ki taraf badh rahi Shruti ka peechha karti rahi...
"abey ruk toh sahi.." Nitin bhi bade gour se Shruti ko dekhe ja raha tha...

Gate par pahunch kar Shruti thithaki aur peechhe mudkar dekha.. Gadi ki aur.. Nitin muskurane laga aur uski aur apna hath hila diya.. Shruti apni najrein jhukati huyi mudi aur seedhi aage badh gayi...

"ye kya tha bhai.. tu aisa bhi hai kya? kya kar raha tha tu...?" Rohan ne Shruti ke najron se aujhal hote huye poochha...

"ek teer se do shikaar.." kahkar Nitin Rohan ki aur muskuraya aur Gadi chala di....

 

 

 

 

"ye sab kya hai yaar..? tune mujhe pahle kyun nahi bataya? tujhe uss ladki ki nahi kisi achchhe psychologist ki talash karne ki jarurat hai..." Sari baat chupchap sun'ne ke baad Nitin ki yahi pratikriya thi.. Wo aur Rohan baar mein baithe beer pi rahe the...

"tu aisa bol sakta hai bhai.. kyunki tere sath aisa hua nahi hai.. tu nahi samajh sakta.. agar ye sab mere dimag ka fitoor hota toh bata wahi ladki jo mujhe dikhayi deti thi sapnon mein, wo asliyat mein kaise mil gayi.. jabki hum dono ne kabhi ek dusre ko dekha tak nahi hai.. fir uncle ji ne jo kuchh purane teele ke baare mein bataya.. uss ladki ne bhi toh mujhe wahin bulaya tha.. hamari gadi ki apne aap hawa nikal gayi.. subah apne aap bhar gayi.. sapne mein usne mere saamne apni kameej fadi.. aur subah wo bhi sach tha... sabse badi baat toh maine tumhare munh se bhi Neeru ki pukaar suni.. jab ham teele par gaye the.. kya ab bhi tu kahega ki ye sab waham hai..?" Rohan ne apni baat ko pukhta tareeke se pesh karne ke liye inn baaton ko fir se dohraya...

"hummm.. tabhi toh mujhe lag raha hai ki ismein baap beti ki sajish ki boo aa rahi hai.. har sapne ka isi ladki se talluk hai... jisne kahani sunayi.. wo uska baap hai.. teela bhi unke gaanv ka hi hai.. bachcha wo khada kar sakte hain wahan... aur tyres ki hawa bhi nikal sakte hain.. kyunki unhe vishvas hoga ki wapas aate huye hum unka hi darwaja khatkhatayenge... subah jaagne se pahle tyres mein hawa bhi bhar sakte hain.. tumhe yaad hai.. jab hamne unka darwaja khatkhataya toh Shruti ne kya kaha tha.. 'baapu' wo aa gaye....' kya matlab tha iska? yahi na ki wo hamara intjaar kar rahe the... shartiya ye inki hi sazish hai.. tu maan ya na maan.." Nitin ne nishkarsh nikala...

"aur tu jo mujhe Dev.. Dev karke pukar raha tha.. wo?" Rohan uski sari baat sun'ne ke baad bola...

"ab teri dimagi halat hi aisi ho gayi hai toh ye tera waham bhi ho sakta hai.. mujhe toh yahi yaad aa raha hai ki peepal ke ped ki thandi chhaya dekh kar ek baar latene ka mann hua tha.. fir tu mujhe wahan se kandhe par uthakar bhag liya...." Nitin ab bhi Rohan ki poorvjanam aur aatma wali baat par vishvas karne ko taiyaar nahi tha...

"tujhse iss baare mein baat karna hi bekaar hai.. isiliye toh maine itne din tak tujhe kuchh nahi bataya.. sirf Rocky ko hi bataya tha.. par wo darr gaya aur sath aane se inkaar kar diya...."kuchh ruk kar Rohan ne fir bolna shuru kiya," chal teri baat maan bhi leta hoon.. par ek baar Batala jakar uss ladki ka pata lagane mein kya harz hai.. agar koyi Neeru wahan mil gayi toh fir toh tujhe yakeen ho jayega na..." Rohan usko samjha samjha kar thak chuka tha.. par Nitin isko ab tak Sazish hi maan raha tha...

"dekh.. albatta toh koyi ladki tujhe wahan milni nahi hai.. inhone socha hoga ki bus tu ek baar yahan tak aa jaye.. uske baad sharafat aur najakat ka chola pehan kar Shruti tujhe apne aap fansa legi.. par agar koyi ladki wahan mil bhi gayi toh kounsi badi baat hai.. itna bada natak karne walon ke liye.. bol.. ho sakta hai ki wahan baithi Neeru bhi iss sazish mein shamil ho.."

"par tu ye kyun bhool raha hai ki sapne toh khud mujhe aate hain na... ab mera sapna bhi kya kisi ki sazish ka nateeja ho sakta hai? ya tujhe kahin ye toh nahi lag raha ki main bhi sajish mein shamil hoon.. aur jhooth bol raha hoon, sapne ke baare mein..." Rohan ne jhallate huye kaha...

"na.. tu sajish ka hissa kaise ho sakta hai.. agar ye sazish hai toh tere hi khilaaf hai.. par mujhe lagta hai ki sapna sazish ka hissa ho sakta hai.. hamein kisi neurologist se baat karni padegi..." Nitin ne ek aur tark thonk diya...

"shit yaar.. tu baat ko baar baar wahin lakar chhod deta hai.. aakhiri baat ye hai ki kisi ko.. khas tour se inn baap beti ko mere khilaf sazish se milega kya?" Rohan ke sabra ka bandh toot'ta ja raha tha...

"teri akoot doulat.. tujhe pyar ke jaal mein fansakar ye ya wo Neeru tujhse shadi kar sakti hain.. aur fir aadhi jaydaad ki maalik ban sakti hain.. ismein kisi aur ka hissa bhi ho sakta hai.. maslan tere kisi khas dost ya rishtedaar ka.. kyunki inn logon ke vash mein nahi hai itni badi planning.. hamein inki jadein tatolni hongi.... koyi na koyi toh jaroor hai.. iss sab ke peechhe... aur main aaj hi pata lagakar rahoonga..." Nitin ne beere ki cane khatam karke ek aur faink di..

Rohan ne apna matha peet liya," achchha.. aaj hi pata kar lega? poochh sakta hoon kaise?" Rohan ne vyangya sa kiya...
"kya time hua hai?" Nitin ne poochha...

"1:30 ho gaye.. kyun?"

"shruti aate huye bol rahi thi ki wo 4 baje tak aayegi.. ghar bus se jaane mein usko 1:30 ghanta toh lagta hi hoga.. jaldi se ek ek aur mangwa le.. fir college ke saamne chalte hain?" Nitin ne waiter ko ishara kiya...

"aakhir kya karne ki soch raha hai bhai tu?" Rohan ajeeb tareeke se usko dekhta hua bola...

" Shruti ko sab kuchh batan hi padega..." fir waiter ki aur munh karke bola," 2 chilled aur......."

“tu kya fir se Shruti ko jabardasti gadi mein daalne ki soch raha hai?” Rohan ne aascharya se poochha…

“shhhhhhhh..” Nitin ne apne honton par ungali rakh di…

Rohan ke sochkar hi rongte khade ho gaye,” aur agar wo bekasoor nikli toh?”

“toh kya? Subah usko wapas college chhod denge.. hamein koun jaanta hai?” Nitin ne sahajta se kah diya.. mano koyi baat hi na ho..

“teri gadi ka no.?” Rohan kisi tarah usko iss khurapaat se door karna chahta tha..

“maine aaj tak apni gadi par original no. plate lagayi hai kya?” Nitin shaitani se muskurane laga………

 

 

"main aaj hi chala jaaun ghar? mummy bhi chinta kar rahi hongi.." Rohan uske khurapati dimag ki karastaniyon ke chakkar mein nahi padna chata tha...

"ye toh aur bhi achchha rahega.. waise bhi mujhe aaj tujhe wapas bhejna hi tha... gadi dekar.. par ab toh tujhe taxi karni padegi..." Nitin ne khush hote huye kaha....

"wo koyi problem nahi hai... bus tu dhyan rakhna.. uska najayaj fayda uthane ki koshish mat karna.. bechari bahut masoom hai.." Rohan ne gadi se nikalte huye kaha...

"tu chup rah na yaar.. main kounsa uska balatkaar karne wala hoon.. kuchh poochhna hi toh hai.. haan.. apni marzi se degi toh fir tujhe koyi problem nahi honi chahiye.. theek hai na..." Nitin hanste huye bola...

Rohan ne koyi jawab nahi diya.. wo chupchap Nitin ki aur dekhta raha... beshak Nitin ne koyi galat kaam na karne ka wada kiya tha.. par usko jabardasti raat bhar roke rakhna bhi toh balatkaar se kam nahi tha.. kitni najuk aur kamsin hai bechari.. soch kar hi Rohan ka mann rah rah kar gadi se utar jane ko kar raha tha.. par 'Neeru' ki sachchayi jaan'ne ki utsukta usko kuchh bhi karne ya kahne se rok rahi thi.. Nitin ne jo tark usko iss mayavi rahasya ko sazish sabit karne ke liye diye the.. kahin na kahin uske mann mein bhi kahin koyi gadbadi hone ki aashanka ghar karne lagi thi....

"fir bhi yaar.." Rohan ab bhi Nitin ki jid ke khilaf tha...

"chinta mat kar yaar.. tujhe pata hai.. main dil ka bura nahi hoon..." Nitin ne Rohan se hath milaya aur gadi start kar di....
----------------------------
college ke gate par ghanta bhar intjaar karne ke baad ussko Shruti bahar aati dikhayi di....

"oye.. aa gayi...." Nitin ne mann hi mann kaha aur gadi start kar di...

"chakk le beta.." badbadate huye Nitin ne Gadi thoda aur aage karke usi taraf le gaya jahan Shruti road cross karke aane wali thi...

shruti ne gate se bahar nikalte huye hi unki gadi pahchan li thi aur Nitin ko bhi apni aur taakte dekh liya tha.. usne apna sir jhukaya aur usko najarandaj sa karke college se thoda aage gayi hi thi ki Nitin ne gadi uski barabar mein rok di,"Hi Shruti!"

Shruti ne tirchhi najar se Nitin ko dekha aur bina kuchh bole aage badh gayi.. Nitin ne ek pal bhi nahi ganwaya.. fatafat gadi se utra aur tezi se chalkar uska raasta rok kar khada ho gaya," main bhi gaanv hi ja raha hoon.. aao na.. baith jao.."

"Shruti ne najrein uthakar Nitin ko ghoora," mujhe jane do.. main bus mein hi chali jaaungi.. hato mere raaste se.."

"tum toh bewajah uss baat ko dil par le rahi ho.. wo sirf hulka sa majak tha.. agar main serious hota toh tumhe yahan kyun chhodta.. maan bhi jao.. main wahin ja raha hoon.. gaanv mein.." Nitin ne usko pyar se mana'ne ki koshish ki..

Nitin ki baat ka hulka sa asar usko Shruti par hota dikhayi diya.. uski aankhon ke jhuk jane se ..

"tum samajh kyun nahi rahe ho? ye mera college hai.. yahan sab mujhe jaante hain.. koyi kya sochega..? pls hat jao aur jahan jana hai chale jao.. main bus mein ja sakti hoon.. roz hi jati hoon... pls mujhe jane do.." kahte huye Shruti ne anunay ki mudra mein hath baandh liye...

Nitin ko bhi uski baaton se baat ban'ti dikhayi di..," Mujhe pata nahi tha ki tum itni komal hriday ho ki jara se majak se tum aahat ho jaogi.. maine toh sirf 'apna' maankar majak kiya tha.. yunhi.. tumhare sweet se chehre par gussa bilkul bhi achchha nahi lagta.. kaho toh main yahan sabke saamne kaan pakadne ko taiyaar hoon.. par pls.. maaf kar do.. aur maan jao.. aayinda kabhi aisi galati nahi karoonga.. tumhari kasam...!" aur Nitin sach mein hi apne kaano ko hath lagakar khada ho gaya...

Shruti sharminda si ho gayi.. halanki Nitin ki kahi baaton ne uska dil chhoo liya tha.. fir bhi.. wahan sabke saamne gadi mein baithna asambhav tha.. pahle hi usko apna tamasha banta najar aa raha tha.. jane kya sochkar Shruti ke munh se nikal gaya," thodi aage aa jao pls.. yahan mera yun tamasha na banao.. kahkar wo uski bagal se nikalkar aage badh gayi..

Nitin khushi se uchhalta hua gadi ki aur badha..

Nitin dheere dheere karke gadi aage badha raha tha...

bus-stand kareeb aate hi Shruti ki chal dheemi pad gayi thi.. shayad usne man bana hi liya tha, gadi mein baithne ka.. uske Nitin ke paksh mein faisla karne mein iss baat ne aham prabhav daala ki unhone subah usko sahi salamat College chhod diya tha...

"aa jao ab!" Nitin ne gadi uski barabar mein rok di...

Shruti ne jhijhakte huye sadak par moujood logon par nigah daali.. kisi ko bhi jaan kar na pakar usne fat se khidki kholi aur andar aa baithi..

"jaldi chalo pls... " ek lumbi saans lete huye Shruti ne kaha aur aage wali seat se sir lagakar baith gayi....

 

145

Share this post


Link to post
Share on other sites

frnds late karne k liye sorry main bemar raha hun aur kuch pareshani b thi is iye kafi dair bad update kia haito kafi lamba update dia hai umeed karta hun ap sab ko pasand aye ga

Share this post


Link to post
Share on other sites

Create an account or sign in to comment

You need to be a member in order to leave a comment

Create an account

Sign up for a new account in our community. It's easy!

Register a new account

Sign in

Already have an account? Sign in here.

Sign In Now
Sign in to follow this  

×